Gullmoli dagsins: Valtýr Björn og Buttercup heimsóttu Aftureldingu

Henry Birgir Gunnarsson og Kjartan Atli Kjartansson eru búnir að taka upp nýjan skemmtilegan lið í þætti sínum Sportið í dag en þá grafa þeir upp daglega eina skemmtilega frétt úr safni stöðvarinnar.

Þessi liður nefnist „Gullmoli dagsins“ og í einum þeirra var tekin fyrir heimsókn til handboltaliðsins Aftureldingar.

Bjarki Sigurðsson var í stóru hlutverki í Mosfellsbænum í kringum aldarmótin og hann fékk heimsókn frá íþróttafréttamanninum Valtýr Birni Valtýssyni og hljómsveitinni Buttercup árið 2000.

Afturelding vann þrefalt í karlahandboltanum tímabilið 1998-1999 og fylgdi því eftir með því að verða deildarmeistari tímabilið á eftir.

„Þessi er frábær. Þetta er handbolti og Afturelding þegar þeir voru upp á sitt besta í handboltanum í gamla daga. Okkar manni Valtaranum, Valtýr Birni, datt það í hug að fá Buttercup með sér í heimsókn og úr varð frábær uppákoma sem þið fáið að sjá núna,“ kynnti Henry Birgir Gunnarsson innslagið sem má sjá hér fyrir neðan.

Buttercup syngur þarna lagið sitt „Endalausar nætur“ en söngvararnr eru Valur Sævarsson og Íris Kristinsdóttir.