Óveðurspárnar lítið sem ekkert breyst

Landsmenn búa sig nú undir aftakaveður sem ganga á yfir landið í dag. Appelsínugul viðvörun er í gildi í öllum landshlutum í dag og á Ströndum og Norðurlandi vestra mun rauð viðvörun taka gildi frá klukkan fimm síðdegis, þar sem spáð er ofsaveðri eða fárviðri með mikilli snjókomu og skafrenningi. Þá verða miklar raskanir á þjónustu víða á landinu í dag.

Sjá einnig: Veðurvaktin: Aftakaveður gengur yfir landið 

Elín Björk Jónasdóttir veðurfræðingur hjá Veðurstofu Íslands segir í samtali við fréttastofu að spár dagsins hafi lítið sem ekkert breyst frá því í gær.

„Það er orðið hvasst á annnesjum á norðurströndinni núna og yst á Vestfjörðum erum við farin að sjá þennan mikla streng sem fylgir lægðinni sem er hérna á réttum stað miðað við spárnar í gær,“ segir Elín. „Vestfirðir og strandir finna fyrst fyrir látunum.“

Óveðrið mun standa yfir fram á morgundaginn. Þá taka appelsínugular viðvaranir við á Austurlandi í nótt en á morgun mun hvessa mjög í landshlutanum. Veðrið þar gengur ekki yfir fyrr en á fimmtudag.

Samg ö ngur v íð a í lamasessi

Vegagerðin gerir ráð fyrir að þurfa mögulega að loka einhverjum vegum á meðan veðrið gengur yfir. Þannig verður öllum leiðum út úr höfuðborgarsvæðinu mögulega lokað í um sólarhring frá hádegi.

Á vef Vegagerðarinnar segir að Suðurlandsvegur (frá Rauðavatni að Hveragerði), bæði um Hellisheiði og Þrengsli, verði líklegast lokaður frá hádegi. Sömu sögu er að segja um Reykjanesbraut. Vegagerðin gerir sömuleiðis ráð fyrir að Vesturlandsvegi um Kjalarnes verði lokað klukkan 13 á morgun og í sólarhring.

Á Norðvesturlandi, þar sem veður verður verst, má búast við því að vegum verði lokað í Húnavatnssýslum og þá verður Holtavörðuheiði lokað klukkan tíu. Hér má fylgjast með tilkynningum um lokanir vega.

Þá ríkir óvissa um akstur Strætós í dag vegna óveðursins. Í tilkynningu frá Strætó segir að gera megi ráð fyrir að flestar strætóferðir á landsbyggðinni falli niður eftir hádegi og gætu orðið óvirkar fram á miðvikudag.

Tvísýnt gæti orðið með nokkrar leiðir Strætó innan höfuðborgarsvæðisins, eins og leið 15 sem ekur Vesturlandsveg milli Reykjavíkur og Mosfellsbæjar. Stjórnstöð Strætó fylgist náið með stöðunni og tilkynnir um frávik sem kunna að verða á akstri.

Röskun verður á millilandaflugi um Keflavíkurflugvöll þegar líður á daginn. Nú þegar hefur öllum ferðum Icelandair síðdegis verið aflýst. Ferðir annarra flugfélaga eru margar enn sem komið er á áætlun og er fólki bent á að fylgjast með uppfærslum á heimasíðu flugvallarins.

B ö rnin haldi sig heima

Þá fellur skólahald víða niður á landinu. Öllu skólahaldi hefur verið aflýst á Norðurlandi vestra í dag og á miðvikudag. Skólahald í leik- og grunnskólum Snæfellsbæjar fellur einnig niður í dag. Á Vestfjörðum er mælst til þess að börn verði heima í dag en skólar þar verða þó opnir.

Þá fellur skólahald niður í dag í Varmalandsdeild og Kleppjárnsreykjadeild Grunnskóla Borgarfjarðar, sem og í Grenivíkurskóla og Þelamerkurskóla.

Í Reykjavík raskast skóla- og frístundastarf eftir hádegi og eru foreldrar beðnir um að sækja börn sín fyrir klukkan 15.

Óvissustig vegna snjóflóðahættu á Mið-Norðurlandi tekur gildi núna klukkan átta og búast má við því að snjóflóðahætta geti skapast í fjalllendi í Skagafirði, Tröllaskaga og austur fyrir Eyjafjörð. Viðbúið er að snjóflóð falli í bröttum brekkum sem safna í sig snjó í norðaustan- og norðanáttum, einkum þar sem snjór safnast í gil.

Fylgst verður með snjóflóðahættu í byggð en reistar hafa verið varnir í þéttbýli þar sem hættan var áður mest, t.d. á Siglufirði. Síðdegis í gær lýsti Ríkislögreglustjóri yfir óvissustigi á landinu. Ákvörðunin er tekin í samráði við alla lögreglustjóra landsins og í samræmi við veðurspá Veðurstofu Íslands.

Í tilkynningu frá Almannavörnum segir að óvissustigi sé lýst yfir þegar grunur vaknar um að eitthvað sé að gerast af náttúru- eða mannavöldum, sem á síðari stigum gæti leitt til þess að heilsu og öryggi fólks, umhverfis eða byggðar séógnað. Samráð á milli almannavarna og þeirra stofnana sem málið varðar er aukið.

Í gærkvöldi lögðu björgunarsveitarmenn af stað úr Reykjavík með þrjá snjóbíla norður í land. Bílarnir verða til taks í ofsaveðrinu sem spáð er á Ströndum og Norðurlandi vestra. Að sögn Davíðs Más Bjarnasonar, upplýsingafulltrúa Landsbjargar, fara hátt í tuttugu björgunarsveitarmenn á vettvang með bílunum þremur. Einn bíllinn verður staðsettur á Hólmavík, annar í Hrútafirði og sá þriðji í Skagafirði.