Fjórir látnir í skotárás í Kansas

Fjórir eru látnir eftir að byssumaður hóf skothríð á bar í Kansas City í Kansas snemma á sunnudagsmorgun. Fréttastofa CNN hefur eftir lögreglu að alls hafi níu verið skotnir.

Tilkynnt var um skotárásina á barnum Tequila KC um klukkan hálf tvö eftir miðnætti að staðartíma. Þegar lögregla kom á vettvang voru fjórir þegar látnir inni á barnum en árásarmaðurinn var á bak og burt. Fimm voru fluttir á sjúkrahús og er ástand þeirra sagt stöðugt. 

Lögregla hefur enn ekki haft uppi á byssumanninum en leit stendur nú yfir. Ekki hafa fengist nægar upplýsingar til þess að lýsa eftir honum og þá er ekki heldur vitað hvort fleiri en einn hafi verið að verki. Ekki hefur enn reynst unnt að bera kennsl á fórnarlömb árásarinnar.

Fréttin hefur verið uppfærð.