33 milljóna úttektir í spilasölum og 4,3 milljóna bíll greiddur með reiðufé

Meðal þeirra útgjalda pólskra hjóna sem héraðssaksóknari hefur ákært fyrir peningaþvætti og telur að sé ekki trúverðugar skýringar á eru 33,4 milljóna króna úttektir í spilakössum og kaup eiginkonunnar á Hyunday Tucson að andvirði 4,3 milljóna, sem hann greiddi fyrir með reiðufé.

Fjallað hefur verið um ákæruna gegn hjónunum í fjölmiðlum í dag en meðal þess sem komið hefur fram er að skýringin á hversu hátt þau hafi lifað á undanförnum árum sé sú að eiginmanninum hafi gengið svo vel í spilakössum.

Hjónin eru ákærð fyrir peningaþvætti með því að hafa á tímabilinu janúar 2013 til desember 2017 tekið, við, nýtt, umbreytt eða aflað sér ávinnings af refsiverðum brotum upp á rúmlega 60 milljónir króna

Er það mismunurinn á milli rekjanlegra útgjalda þeirra á tímabilinu, auk innistæðna og haldlagðs reiðufjár, alls 97,8 milljónir króna og tekna þeirra á sama tímabili samkvæmt opinberum skráningum, alls 37,6 milljónir króna.

Í ákærunni segir að ljóst sé að framtaldar tekjur þeirra gætu aldrei staðið undir lifnaði þeirra og eignamyndun.

Um er að ræða anga svokallaðs Euromarket-máls sem upp kom fyrir um tveimur árum. Lögregla handtók manninn og fjóra Pólverja til viðbótar hér á landi í desember 2017 og úrskurðaði þrjá í gæsluvarðhald grunaðir um stórfelldan innflutning og framleiðslu fíkniefna, fjársvik og peningaþvætti. Aðrir angar málsins eru enn til rannsóknar hjá lögreglu. 

Ekki mögulegt að græða þessar upphæðir í spilakössum á þessum tíma

Til þess að leggja mat á skýringar hjónanna í málinu lagðist lögregla í greiningarvinnu á mögulegum spilatíma mannsins í spilasölum. Miðað var við staðsetningu út frá símatækjum og gögn úr staðsendingartækjum. Samkvæmt greiningunni var áætlaður spilatími eiginmannsins talinn vera að meðaltali á bilinu 46 til 311 mínútur á dag.

Skýring þeirra á ávinningi af spilakössum var metin ómöguleg af dósent við Háskóla Reykjavíkur. Áætlað tap hefði átt að vera 145 milljónir króna miðað við spilatíma hans og varfærnasta áætlun um tap var upp á ellefu milljónir króna.

Líkt og kom fram í fyrri frétt Vísis af málinu er í nýlegri aðgerðaráætlun gegn peningaþvætti og fjármögnun hryðjuverka sem kom út í ágúst fjallað um veikleika þegar komi að spilakössum. Þar er minnst á falska vinninga. Þannig geti fólk nafnlaust lagt pening inn í spilakassann, leyst út vinning án þess að spila og svo leggja upphæðina þannig inn á banka. Með þeim hætti sé hægt að búa til lögmæta slóð peninga.

Í ákærunni kemur einnig fram að eiginkonan hafi keypt nýjan Hunday Tucson bíl hjá BL ehf. þann 31. mars 2017 fyrir 4,3 milljónir. Greitt var fyrir bílinn í reiðufé. Bíllinn hefur verið kyrrsettur og er hann á meðal þess sem héraðssaksóknari fer fram á að verði gerður upptækur.