Segist hafa fyrirgefið Íslandi „dauða“ og „einskis nýta“ tillögu

Teodoro Locsin Jr. utanríkisráðherra Filippseyja kveðst hafa fyrirgefið Íslendingum að hafa lagt fram tillögu í Mannréttindaráði sameinuðu þjóðanna, sem gerir ráðinu kleift að rannsaka fíkniefnastríð Filippseyjaforseta. Embættismenn í Filippseyjum, Locsin þar á meðal, hafa gagnrýnt Ísland og Íslendinga harðlega eftir að tillagan var samþykkt í sumar.

„Þetta er einskis nýt tillaga [e. It‘s a nothing resolution] vegna þess að þegar allt kemur til alls misheppnaðist hún. Meirihlutinn sat hjá eða sagði nei. Þannig að þetta er dauð tillaga,“ sagði Locsin í viðtali við filippeysku fréttastofuna ABS-CBN í morgun.

Spyrillinn spurði Locsin í framhaldinu hvernig hann gæti haldið því fram að tillagan, sem var samþykkt, hefði misheppnast.

„Ég get sagt það vegna þess að þeir sem kusu já og studdu hana [tillöguna] sögðu mér: „Guð, þið [fulltrúar Filippseyja] komuð af stað frábærri gagnsókn í Genf og við töpuðum.“ Þau töpuðu,“ svaraði Locsin að bragði.

Sjá einnig: Duterte blótar Íslendingum í sand og ösku og vonar að þjóðin frjósi í hel

Tillaga Íslands var samþykkt í Mannréttindaráðinu í júlí. Atkvæðagreiðslunni lyktaði þannig að 18 studdu ályktunina, 15 sátu hjá og 14 voru á móti. Þó að meirihluti ráðsins hafi vissulega setið hjá eða sagt nei við afgreiðslu tillögunnar, líkt og Locsin heldur fram, breytir það því ekki að tillagan hlaut brautargengi.

Viðtal ABS-CBN við Locsin má sjá í spilaranum hér að neðan.

Locsin var einnig inntur eftir útskýringum á tísti sem hann birti á Twitter-reikningi sínum 8. september síðastliðinn. Þar greindi hann frá því að hann hefði fyrirgefið Íslendingum, þó að tístið snúist að mestu um gríðarlega hrifningu hans á nýju skipi filippseysku strandgæslunnar. Liðsmenn gæslunnar hófu æfingar á skipinu í Frakklandi í vikunni.

„Lengi lifi Frakkland!!!!! Tillaga Íslands er gleymd og grafin; hún var ekki neitt hvort sem er. Eins og ég segi alltaf, Frakkar gera það alltaf betur – í ástum og stríði og öllu þar á milli. Ég ætla að kyssa skipsskrokkinn á þessum báti,“ skrifaði Locsin.

Locsin ítrekaði afstöðu sína gagnvart skipinu í þætti ABS-CBN og gaf í skyn að öll gremja í garð Íslands vegna tillögunnar hafi gufað upp þegar hann bar hið „glæsilega“ fley augum.

„Ætla þau að grafa upp öll líkin?“

Locsin setti sig hins vegar alfarið upp á móti því að hleypa fulltrúum Mannréttindaráðsins eða öðrum inn í Filippseyjar til að gera úttekt á ástandinu í landinu.

„Nei, ég vil ekki að þau komi hingað og segi að allt sem þeim hefur ekki tekist að sanna sé satt vegna þess að þau sáu það. Hvernig? Ætla þau að grafa upp öll líkin?“ spurði Locsin.

Þá sagði hann að ekki stæði til að Filippseyjar drægju sig úr Mannréttindaráði Sameinuði þjóðanna. Áður hafði hann ýjað að slíku vegna tillögu Íslendinga í Mannréttindaráðinu.

Með samþykkt íslensku ályktunarinnar lýsti Mannréttindaráðið formlega yfir áhyggjum af ástandinu á Filippseyjum. Þá hvatti ráðið filippseysk stjórnvöld til að stöðva aftökur á fólki án dóms og laga, sem stjórnvöld hafa réttlætt á grundvelli svokallaðs stríðs gegn eiturlyfjum, og draga þá til ábyrgðar sem hafa staðið fyrir slíku. 

Embættismenn á Filippseyjum, einkum forsetinn Rodrigo Duterte og áðurnefndur Locsin, hafa brugðist ókvæða við samþykktinni og hefur reiðin einkum beinst að Íslandi.

Þannig hefur Duterte sagst íhuga það af alvöru að slíta stjórnmálasambandi Filippseyja við Ísland. Í lok síðasta mánaðar gagnrýndi hann svo stefnu Íslands hvað varðar þungunarrof harkalega. Þá blótaði hann Íslendingum í sand og ösku, auk þess sem að hann sagðist vona að þjóðin frjósi í hel.