Þægilegur sigur hjá Íslendingaliði GOG

Íslendingalið GOG vann sjö marka sigur á Mors-Thy í dönsku úrvalsdeildinni í handbolta í kvöld.

GOG byrjaði leikinn betur og komst fljótt þremur mörkum yfir. Heimamenn í Mors-Thy unnu sig hins vegar aftur inn í leikinn og var nokkuð jafnræði með liðunum. Þegar leið á tók GOG forystuna á ný og var staðna 9-15 í hálfleik.

Gestirnir héldu forskoti sínu í seinni hálfleik og fóru með nokkuð þægilegan 22-29 sigur.

Viktor Gísli Hallgrímsson byrjaði í marki GOG og varði hann níu bolta og var með 34 prósenta markvörslu. Óðinn Þór Ríkharðsson gerði tvö af mörkum GOG og Arnar Freyr Arnarsson þrjú.