Heiðra Eagles með tónleikum

„Ég er svo væminn að uppáhalds Eagles-lagið mitt er Peaceful easy feeling. Ég vona að ég fái að syngja það, ef Matti og Vignir verða ekki of frekir, annars gerum við út um það í sjómann,“ segir tónlistarmaðurinn Jógvan Hansen en hann og félagar hans Matti Matt og Vignir Snær, blása til tónleika þar sem þeir flytja öll bestu lög Eagles.

Tónleikarnir fara fram í Salnum í Kópavogi þann 26. október og þar á eftir er ferðinni heitið norður.



„Við verðum á Græna hattinum 31. október og á Rauðku á Siglufirði 1. nóvember.  Svo erum við að vinna í fleiri tónleikum um landið,“ segir Jógvan. Þá hafi lengi langað að flytja lög Eagles á tónleikum.

„Þetta er svo ótrúlega góð hljómsveit og raddsetningarnar í öllum þeirra lögum eru svakalega flottar. Það er sérstaklega skemmtilegt að flytja þessa tónlist og um það snýst þetta hjá okkur, og að sýna hvað við erum fjölhæfir tónlistarmenn,“ segir hann hlæjandi en þeir verða bara þrír á sviðinu og sjá um allan flutning sjálfir.

„Það verður áskorun. Vignir kann reyndar að spila á öll strengjahljóðfæri í heiminum og Matti er líka mjög seigur, spilar meðal annars á bassa og ég bæti svo fiðlunni inn í þetta og spila á gítar. Svo vinnur tæknin líka með okkur. Það er hægt að gera allskonar hluti með henni þannig að við munum hljóma eins og við séum miklu fleiri en þrír á sviðinu. Við viljum búa til flotta upplifun fyrir gesti,“ segir Jógvan.

Miðarnir rjúki út eins og heitar lummur og hver fari að verða síðastur að ná sér í miða. Þá sé ekki útilokað að tónleikarnir verði fleiri.

„Það er aldrei að vita. Eagles hafa gert svo ótrúlega mörg flott lög, Hotel California, Desperato, Lying eyes, Tequila Sunrice og mörg, mörg fleiri, og allir eiga sitt uppáhalds Eagles-lag.

Það er ekki sjálfgefið að búa til tónlist sem allir geta tengt við og er svona auðveld að hlusta á. Þess vegna er þessi hljómsveit svona stór og hefur gengið áratugum saman. Okkur langar til að heiðra þessa listamenn. Við Matti og Vignir höfum lengi unnið saman og erum allir miklir aðdáendur þessara laga. Það mun skila sér á tónleikunum,“ segir Jógvan.

Uppáhalds Eagles-lag Jógvans má spila hér fyrir neðan:

Þessi kynning er unnin í samstarfi við JHHJ