Kristján Örn fer til Frakklands næsta sumar

Stórskytta ÍBV, Kristján Örn Kristjánsson eða Donni, mun yfirgefa eyjuna fögru næsta sumar því hann er búinn að semja við franskt úrvalsdeildarfélag.

Það heitir AIX Pauc og situr í sjötta sæti frönsku úrvalsdeildarinnar eftir tvo leiki.

„Þetta er bolti sem fór af stað þegar við mættum þeim í Evrópukeppninni í október í fyrra. Þeir hafa verið að fylgjast með honum og buðu honum út í janúar til að skoða aðstæður. Fljótlega í kjölfarið fóru af stað samningaviðræður. Frakkarnir vildu fá hann strax í sumar en Donni ákvað að taka eitt tímabil í viðbót á Íslandi og klára samninginn við okkur,“ sagði Davíð Þór Óskarsson, formaður handknattleiksdeildar ÍBV, við Eyjafréttir.

Skyttan magnaða skoraði 12 mörk í fyrsta leik ÍBV í Olís-deildinni og stefnir á að bæta sig mikið í vetur áður en hann heldur utan.

„Þetta er búin að vera mikil hvatning fyrir mig að bæta mig. Sérstaklega varnarlega. Ég er búinn að æfa mjög vel í sumar, lyfta mikið og huga vel að mataræði. Ég finn líka að ég er miklu öruggari í öllum mínum aðgerðum,“ sagði Donni.