Sport

Íslenski hópurinn þrettán sinnum á palli í Helsinki

Arnar Geir Halldórsson skrifar
Verðlaunahafar ásamt þjálfurum, frá vinstri: Helgi Jóhannesson, landsliðsþjálfari í kata; Eydís, Aron Bjarkason, Tómas, Oddný, Aron Huynh, Þórður, Samuel, Ólafur, Viktoría, og Ingólfur Snorrason, landsliðsþjálfari í kumite. Á myndina vantar Kristjönu.
Verðlaunahafar ásamt þjálfurum, frá vinstri: Helgi Jóhannesson, landsliðsþjálfari í kata; Eydís, Aron Bjarkason, Tómas, Oddný, Aron Huynh, Þórður, Samuel, Ólafur, Viktoría, og Ingólfur Snorrason, landsliðsþjálfari í kumite. Á myndina vantar Kristjönu. KAÍ
Íslenska landsliðið í karate tók þátt í opnu móti í Helsinki í Finnlandi um helgina en íslensku keppendurnir voru tólf talsins. Alls tóku yfir 600 keppendur frá 23 löndum þátt í mótinu.

Bestum árangri í íslenska liðinu náðu þeir Samuel Josh Ramos og Aron Anh Ky Huynh. Samuel keppir í U16 ára flokki í kumite. Hann vann fimm af sex viðureignum sínum í gær; tók gullið örugglega í þyngdarflokki sínum og brons í opnum flokki. Samuel skoraði 26 stig í viðureignunum sex en fékk aðeins 6 stig á sig.



Aron vann svo silfur í bæði fullorðinsflokki og U21 árs flokki í kata. Aron vann alla andstæðinga sína í undanrásum beggja flokka og komst í úrslit. Þar laut hann í lægra haldi fyrir víetnamska landsliðsmanninum Khuat Huy Thang eftir jafnar og góðar viðureignir. Þess má geta Khuat er geysilega sterkur keppandi og vermir 9. sæti heimslistans í kata U21 árs karla.
 
Samuel og Aron verða næst í eldlínunni í Laugardalshöllinni 14.-15. september, þegar Ísland heldur Smáþjóðamótið í karate. Þeir hafa báðir orðið Smáþjóðameistarar í sínum greinum, Samuel árið 2018 og Aron árið 2017, og eru til alls líklegir.

Alls féllu 13 verðlaun Íslendingum í skaut á mótinu; ein gullverðlaun, fimm silfurverðlaun og 7 bronsverðlaun.

Verðlaunahafar voru eftirfarandi.

Samuel Josh Ramos, gull í -63kg og brons í opnum flokki, U16 kumite

Aron Anh Ky Huynh, silfur í U21 kata og silfur í senior kata

Viktoría Ingólfsdóttir, silfur í opnum flokki U16 kumite

Eydís Magnea Friðriksdóttir, silfur í U16 kata og brons í U18 kata

Kristjana Lind Ólafsdóttir, silfur í +59 kg flokki U18 kumite

Þórður Jökull Henrysson, brons í U18 kata.

Oddný Þórarinsdóttir, brons í U16 kata

Tómas Pálmar Tómasson, brons í U16 kata

Aron Bjarkason, brons í -67 kg flokki kumite

Ólafur Engilbert Árnason, brons í -75 kg flokki kumite
Íþróttir Karate

Mest lesið


Fleiri fréttir

Sjá meira


×

Mest lesið