Segist hafa verið „meginskotmarkið í þessari aðgerð“

Sigmundur Davíð Gunnlaugsson, formaður Miðflokksins og fyrrverandi forsætisráðherra, sakar fulltrúa á Alþingi um að hafa „nýtt glæp“ til að reyna að klekkja á pólitískum andstæðingum þegar forsætisnefnd Alþingis vísaði Klaustursmálinu til siðanefndar.

Í kvöldfréttum RÚV sagði Sigmundur að niðurstaða siðanefndar Alþingis sem forsætisnefnd staðfesti og birti í dag væri til marks um hversu „fáránleg“ vegferðin hefði verið.

Bergþór Ólason og Gunnar Bragi Sveinsson, þingmenn Miðflokksins, töldust brotlegir við siðareglur fyrir alþingismenn samkvæmt niðurstöðu siðanefndar.

Segir þingmenn Miðflokksins þolendur mannréttindabrots

„Staðreyndin er sú að Alþingi setur landsmönnum lög sem það ætlast til að þeir fylgi. Í næsta húsi við þingið eru lög brotin með mjög alvarlegum hætti og í raun mannréttindi um leið og þá sjá ákveðnir þingmenn tækifæri í því að nýta það sem tækifæri til að refsa þolendum brotsins og fara af stað í átta mánaða leiðangur og lenda í vandræðum á hverju stigi,“ segir Sigmundur um Klaustursupptökurnar.



„Það var allt reynt, hvað stendur eftir til dæmis hvað sjálfan mig varðar? Ég held að það sé alveg óhætt að segja að ég hafi verið meginskotmarkið í þessari aðgerð en þrátt fyrir átta mánaða tilraunir þar sem menn fóru mira að segja á svig við lög og grundvallarreglur réttarríkisins tókst ekki annað en að sýna fram á að það hefði ekkert brot átt sér stað,“ segir Sigmundur.

 

Óskar ekki verstu óvinum sínum siðanefndarferlið

Hann segir að siðanefndarferlið fráleitt fyrirkomulag og talar um „sneypuför forseta Alþingis og félaga hans“ í því samhengi.

„Ég vona það að menn læri það þó af þessu að laga þetta fyrirkomulag því ég myndi ekki óska verstu óvinum mínum þess að ganga í gegnum svona ferli, ekki bara þeirra vegna, heldur vegna þess að þetta er stórskaðlegt fyrir samfélagið og fyrir pólitíkina að það sé hægt að setja hlutina í það horf að pólitískir andstæðingar geti rekið mál áfram jafnvel í andstöðu við lög til þess að leyta að einhverju til að klekkja á andstæðingum sínum.“

Þegar Sigmundur er spurður hvort niðurstaða siðanefndar hefði einhverjar afleiðingar fyrir þingmennina sem um ræðir segir Sigmundur:

„Í fyrsta lagi er náttúrulega bara sorglegt að Alþingi skuli láta hafa sig út í það, eða einhverjir fulltrúar Alþingis, að nýta glæp til að reyna að klekkja á pólitískum andstæðingum og þar af leiðandi er niðurstaðan eins og við höfum sagt frá upphafi alltaf ógild þó að menn hafi einungis náð að finna eitthvað til að reyna að hanka tvo. En hvað þá tvo varðar, mér dettur ekki í hug að halda því fram að Haraldur Benediktsson og Steinunn [Þóra Árnadóttir] eigi að fá að segja til um það hverjir eru hæfir til að vera þingmenn. Það eru kjósendur sem gera það og kjósendur munu taka afstöðu til þess og einnig starfa þeirra og annarra sem að þessu máli hafa komið.“