21 árs karlmaður grunaður um skotárásina

Í það minnsta tuttugu létu lífið í skotárás í verslunarkjarna í El Paso í Texasríki í dag og tuttugu og sex eru slasaðir. Flest fórnarlömbin voru stödd í Walmart verslun þegar skotárásin hófst.

Hinn 21 árs gamli Patrick Crusius er í haldi lögreglu grunaður um árásina. Yfirvöld rannsaka nú færslu sem Crusius birti á Internetinu nýlega sem gæti tengst árásinni á einhvern hátt. Ekki hefur fengið staðfest að Crusius hafi skrifað umrædda færslu.

Margir voru staddir í versluninni að versla skólaföng þegar skotárásin hófst. Er talið að viðskiptavinir verslunarinnar hafi verið á milli eitt til þrjú þúsund þegar Crusius hóf skothríðina og um það bil hundrað starfsmenn voru við störf.

Ellefu fluttir á Del Sol sjúkrahúsið í El Paso. Níu eru í lífshættu en samkvæmt talsmanni sjúkrahússins er líðan þeirra stöðug. Þá voru þrettán fluttir á háskólasjúkrahúsið í El Paso og lést einn þeirra eftir komuna á sjúkrahúsið.

Trump segir fregnir af árásinni mjög slæmar

Donald Trump Bandaríkjaforseti tjáði sig um árásina á Twitter-síðu sinni og sagði fréttirnar vera „mjög slæmar“. Hann segist vinna nú með yfirvöldum á svæðinu og hefur lofað ríkisstjóranum fullum stuðningi.

Terrible shootings in ElPaso, Texas. Reports are very bad, many killed. Working with State and Local authorities, and Law Enforcement. Spoke to Governor to pledge total support of Federal Government. God be with you all!

— Donald J. Trump (@realDonaldTrump) August 3, 2019

„Hræðileg skotárás í ElPaso, Texas. Fregnirnar eru mjög slæmar, margir dánir. Starfa nú með ríkis- og svæðisyfirvöldum og lögreglu. Talaði við ríkisstjórann til þess að lofa fullum stuðningi ríkisstjórnarinnar. Guð veri með ykkur öllum,“ skrifaði forsetinn.

Beto O‘Rourke, einn frambjóðenda í forvali Demókrataflokksins fyrir forsetakosningarnar árið 2020, tjáði sig um árásina á viðburði í Las Vegas. Hann sagði El Paso vera „sterkasta stað í heimi“ og bætti við að samfélagið myndi standa saman en hann var áður þingmaður fyrir svæðið.

„Við vitum að það er mikið um meiðsl og mikið um þjáningar í El Paso núna. Ég er ótrúlega leiður og það er mjög erfitt að hugsa um þetta,“ sagði O‘Rourke.

Samfélagið harmi slegið 

Aðgerðir lögreglu náðu yfir stórt svæði og voru margar verslanir lokaðar af. Mikill viðbúnaður var á svæðinu, mikill fjöldi lögreglumanna og annarra viðbragðsaðila tóku þátt í aðgerðunum og þyrlur flugu yfir svæðið á meðan fólk reyndi að forða sér.

Á Twitter-síðu Walmart kemur fram að starfsmenn séu í áfalli yfir atburðum dagsins. Fyrirtækið muni vinna náið með yfirvöldum og hugur þeirra sé hjá fórnarlömbum og aðstandendum þeirra.

We're in shock over the tragic events at Cielo Vista Mall in El Paso, where store 2201 & club 6502 are located. We’re praying for the victims, the community & our associates, as well as the first responders. We’re working closely with law enforcement & will update as appropriate.

— Walmart (@Walmart) August 3, 2019

Oscar Collazo, umsjónarmaður veitingastaðar á svæðinu, opnaði þó dyr sínar fyrir þremur kvenkyns starfsmönnum Walmart sem höfðu komist út úr versluninni. Hann segir konurnar þrjár hafa verið hræddar en þó ekki slasaðar.

„Okkur datt ekki í hug að þetta myndi gerast svo nálægt okkur. Þú sérð endalausar fréttir um svona lagað en þú trúir ekki að þetta gæti gerst hér þar til það gerist,“ sagði Collazo í samtali við CNN.

Aðeins sex dagar frá skotárás í Kaliforníu 

Fjórir létust og þrettán særðust í skotárás á matarhátíð í borginni Gilroy í Kaliforníuríki fyrir sex dögum síðan. Árásarmaðurinn lét til skarar skríða þegar matarhátíðinni var við það að ljúka.

Árásarmaðurinn var skotinn til bana af lögreglu en hann er sagður hafa verið hvítur karlmaður á fertugsaldri og notaði riffil við verknaðinn. Á meðal þeirra sem féllu í árásinni var hinn sex ára gamli Steven Romero.

Skotárásin í dag var sú 250. í ár þar sem í það minnsta fjórir láta lífið eða særast af völdum skotvopna.