Banaslys skammt frá Hólmavík

Ökumaður bifhjóls lést eftir alvarlegt umferðarslys á Innstrandavegi, skammt frá Hólmavík, síðdegis í gær. Þetta kemur fram í tilkynningu frá lögreglunni á Vestfjörðum.

Í tilkynningu lögreglunnar segir að síðdegis í gær hafi henni borist tilkynning um alvarlegt umferðarslys.

 

Þar hafði bifhjóli verið ekið aftan á bifreið með þeim afleiðingum að ökumaður bifhjólsins slasaðist mikið og lést skömmu síðar. Ekki er hægt að greina frá nafni hins látna að svo stöddu.

Það er lögreglan á Vestfjörðum sem fer með rannsókn málsins í samvinnu við tæknideild lögreglunnar á höfuðborgarsvæðinu. Þá kom rannsóknarnefnd samgönguslysa einnig á vettvang vegna rannsóknar málsins.

Um er að ræða annað banaslysið á innan við viku á Vestfjörðum. Starfsmaður á veghefli á Ingjaldssandsvegi lést þann 27. júní síðastliðinn við störf.

Fréttin hefur verið uppfærð.