Fyrrverandi trommari Guns N' Roses á spítala eftir að hafa stungið sjálfan sig

Steven Adler, fyrrum trommari stórhljómsveitarinnar Guns N‘ Roses, var í nótt fluttur á sjúkrahús eftir að lögreglu barst tilkynning um að maður hafi stungið sjálfan sig.

Í ljós kom að maðurinn var enginn annar en Adler og sótti sjúkrabíll hann á heimili hans í Los Angeles. Slúðursíðan TMZ greinir frá.

Adler var snögglega fluttur á sjúkrahús en sár hans eru ekki talin lífshættuleg. Þá er enginn annar talinn viðriðinn atvikið nema hann sjálfur.

Adler hefur löngum glímt við fíknivanda. Árið 1990 var honum sparkað úr rokkhljómsveitinni frægu fyrir fíkniefnanotkun sína. Hann hefur síðan þá komið fram í þáttum á borð við Celebrity Rehab with Dr. Drew og Sober House, en báðir þessir þættir fjalla um baráttu þekkta einstaklinga við fíkn af einhverju tagi.