Tyrk­neskur blaða­­maður segir reiði stuðnings­mannanna vera meira grín en al­vara

Alda neikvæðra ummæla sem gengur nú yfir íslenska Twitter-notendur virðist vera meira grín en alvara að sögn Serkan Algan, tyrknesks blaðamanns sem fylgst hefur með umfjöllun um stóra burstamálið í Istanbúl. Hann segir málið einnig vera fyrirferðarmikið í fjölmiðlum ytra.

Reiðir Tyrkir hafa í dag og í gær herjað á íslenska samfélagsmiðlanotendur, fyrst og fremst í von um að finna þann sem beindi uppþvottabursta að Emre Belozoglu, leikmanni tyrkneska landsliðsins, og þóttist ætla nota hann sem hljóðnema. Lágu margir undir grun, þar á meðal íþróttafréttamaðurinn Benedikt Grétarsson.

Sjá einnig: Pollrólegur yfir reiðum Tyrkjum á Twitter: „Ég ætla ekkert að breyta um lögheimili“

„Ég held að fólk sé fyrst og fremst að grínast,“ segir Serkan í samtali við Vísi. Hann segir málið klassískt dæmi þess  að eitthvað mál heltaki þjóðina í nokkra daga áður en það líður hjá og fólk sé fyrst og fremst að taka þátt í þeirri bylgju. Alvaran sé því ekki jafn mikil og margir Íslendingar töldu.

Hann segir marga Tyrki grínast með málið á Twitter og mörgum þyki málið allt saman afar spaugilegt. Það hafi verið samstaða um að leita að þeim sem var með uppþvottaburstann í fyrstu og þegar var búið að taka einn fyrir og ganga úr skugga um að hann væri ekki sá seki var leitinni haldið áfram. Í dag kom svo í ljós að huldumaðurinn með burstann var í raun Belgi.

Serkan segir þó ákveðinn hóp nýta sér málið í ljósi þess að stutt er í kosningar í landinu og þetta sé kjörið tækifæri til þess að ala á þjóðerniskennd. Þetta eigi því að vera dæmi um að Evrópubúar líti niður á Tyrki.

„Það er ákveðinn hópur fólks í Tyrklandi sem er þjóðernissinnaður. Þau eru að reyna að nota þetta til þess að hafa áhrif á einhverja aðila og sýna fram á að Evrópubúar vilji gera lítið úr okkur þannig sumir reyna að gera meira mál úr þessu en þörf er á.“

Segir enga rasíska undirtóna í burstanum 

Aðspurður hvort það sé einhver dýpri merking á bak við burstann sem gæti farið fyrir brjóstið á Tyrkjum segir Serkan svo ekki vera. Það eina sem gæti verið móðgandi er sú staðreynd að burstarnir sem við þekkjum sem uppþvottabursta hérlendis eru notaðir sem klósettburstar í Tyrklandi.

„Þeir sem hafa farið til Ameríku eða Evrópu vita að þetta er uppþvottabursti en hér í Tyrklandi er þetta bursti sem við notum til þess að þrífa klósett. Því gætu sumir túlkað þetta sem skilaboð um að tyrkneskt fólk sé skítugt eða ógeðslegt,“ segir Serkan en tekur þó sérstaklega fram að flestir Tyrkir hafi tekið uppátæki Belgans sem gríni.

Þá bendir hann á að það sé mjög stutt síðan að Íslendingar voru síðast í umræðunni í Tyrklandi, þegar Eurovision fór fram í maí síðastliðnum. Uppátæki Hatara að veifa fána Palestínumanna hafi vakið mikla athygli og fögnuðu margir Tyrkir Hatara vel og innilega í kjölfarið.

„Við fögnuðum öll þegar Hatari dró upp fánann. Þá voru allir Tyrkir með Íslandi í liði þannig það er ekki lengra síðan. Þetta er bara tímabil held ég,“ segir Serkan léttur að lokum.