María fiskaði víti þegar Noregur fór áfram

María Þórisdóttir lék allan leikinn í vörn Noregs sem tryggði sér sæti í 16-liða úrslitum HM kvenna með sigri á Suður-Kóreu, 1-2, í lokaleik sínum í A-riðli.

Bæði mörk Noregs komu úr vítaspyrnum. Strax á 5. mínútu var togað í Maríu innan teigs og víti dæmt. Caroline Graham Hansen fór á punktinn og skoraði.

Hansen fiskaði svo víti í upphafi seinni hálfleiks sem Isabell Herlovsen skoraði úr og kom Noregi í 0-2.

Þrátt fyrir erfiða stöðu hélt Suður-Kórea áfram að sækja og uppskar mark á 78. mínútu þegar Min-ji Yeo kom boltanum framhjá Ingrid Hjelmseth í norska markinu.

Þetta reyndist eina mark Suður-Kóreu á HM en liðið tapaði öllum þremur leikjunum sínum og endaði í neðsta sæti A-riðils.