Víkingur Ólafsvík vann nýliðana

Víkingur Ólafsvík, Keflavík, Fjölnir og Njarðvík byrjuðu tímabilið í Inkassodeildinni á sigri en deildin fór af stað um helgina.

Grótta kom upp í Inkassodeildina síðasta haust og byrjaði á erfiðum útileik í Ólafsvík. Víkingar voru í toppbaráttu í deildinni síðasta sumar og sýndu gæði sín í dag.

Jacob Andersen skoraði fyrsta mark leiksins á 34. mínútu og Harley Willard bætti örðu við á 89. mínútu, Víkingur vann 2-0 sigur.

Keflvíkingar féllu úr efstu deild síðasta haust án þess að vinna leik. Þeir eru strax búnir að gera betur á þessu tímabili því fyrsti sigurinn kom í fyrsta leiknum.

Gestirnir í Fram byrjuðu leikinn í Keflavík hins vegar betur og kom Helgi Guðjónsson þeim yfir á sjöundu mínútu. Það var ekki fyrr en á 69. mínútu að Dagur Ingi Valsson náði að jafna fyrir Keflavík og rétt undir lok leiksins gerði varamaðurinn Jóhann Þór Arnarsson sigurmarkið fyrir Keflavík, lokatölur 2-1.

Í Grafarvogu unnu Fjölnismenn 2-1 sigur á Haukum. Albert Brynjar Ingason, sem kom til Fjölnis í vetur, skoraði fyrsta markið á 23. mínútu og tíu mínútum seinna bætti Hans Viktor Guðmundsson marki við fyrir Fjölni.

Haukar náðu að minnka muninn á 90. mínútu en það kom of seint og heimamenn unnu sigur.

Á Eimskipsvellinum í Laugardal sóttu Njarðvíkingar þrjú stig með 3-2 sigri á Þrótti.

Brynjar Freyr Garðarsson kom gestunum yfir á sjöundu mínútu en Rafael Victor jafnaði metinn á 14. mínútu og var staðan jöfn í hálfleik.

Á 67. mínútu fékk Þróttur víti þegar Brynjar Atli Bragason braut á Ágústi Leó Björnssyni. Aron Þórður Albertsson fór á punktinn og skoraði.

Stéfán Birgir Jóhannesson jafnaði hins vegar metin á 70. mínútu og tveimur mínútum seinna kom Bergþór Ingi Smárason Njarðvíkingum yfir. Þar við sat, Njarðvík fór með sigur.

Upplýsingar um úrslit og markaskorara eru fengnar frá Fótbolta.net.