Enski boltinn

Fimm prósent miða sem Liverpool fær á úrslitaleikinn kosta 82 þúsund krónur stykkið

Óskar Ófeigur Jónsson skrifar
Ungur stuðningsmaður Liverpool sem fór í gegnum mikinn tilfinningarússibana á Anfield á þriðjudagskvöldið.
Ungur stuðningsmaður Liverpool sem fór í gegnum mikinn tilfinningarússibana á Anfield á þriðjudagskvöldið. Getty/Robbie Jay Barratt
Það verður örugglega barist um miðana hjá stuðningsmönnum Liverpool og Tottenham en félögin fá bæði tæplega sautján þúsund miða á úrslitaleik Meistaradeildarinnar sem fer fram í Madrid 1. júní næstkomandi.

Liverpool komst í úrslitaleikinn á þriðjudagskvöldið en Tottenham tryggði sér farseðilinn í gærkvöldi. Liverpool hefur nú tilkynnt um hvað þessir miðar muni kosta stuðningsmenn félagsins en hvort félag um sig fær samtals 16.613 miða á leikinn.

Tuttugu prósent af miðum Liverpool eru í ódýrasta flokknum og kosta 60 pund stykkið eða 9.600 íslenskar krónur.

54 prósent miðanna munu aftur á móti kosta 154 pund eða tæplega 25 þúsund krónur. 21 prósent miðanna eru enn dýrari og kosta 385 pund sem gera rúm 61 þúsund. Dýrustu miðarnir kosta aftur á móti 82 þúsund krónur stykkið en fimm prósent miða Liverpool eru á 513 pund.





UEFA hefur þegar selt fjögur þúsund miða til áhugafólks út um allan heim en alls tekur Metropolitano leikvangurinn 68 þúsund manns í sæti.

Restin af miðunum fer síðan til staðarhaldara á Metropolitano, Knattspyrnusambands Evrópu, knattspyrnusambanda álfunnar, stuðningsaðila, rétthafa og fyrirtækja.

Liverpool fékk reyndar hundrað miðapör fyrir börn í fylgd með fullorðnum sem kosta 120 pund stykkið eða rúmlega 19 þúsund krónur. Liverpool hefur ekki möguleika á því að fá fleiri miða en það.

Það verða hins vegar 300 miðar í boði fyrir starfsmenn félagsins sem og fjölskyldur og vini leikmannanna.

Þetta er annað árið í röð sem Liverpool fer í úrslitaleik Meistaradeildarinnar en fyrir ári síðan í Kiev kostuðu miðarnir á bilinu 61 til 394 pund. Dýrustu miðarnir í ár eru því mun dýrari en þeir ódýrustu eru á svipuði verði.

Enski boltinn Meistaradeild Evrópu

Mest lesið


Fleiri fréttir

Sjá meira


×

Mest lesið