Lucas Moura aðeins sá tíundi í sögunni sem fær tíu hjá L'Equipe

Lucas Moura var maðurinn á bak við sigur Tottenham á Ajax í Meistaradeildinni í gær en Brasilíumaðurinn skoraði öll þrjú mörk Tottenham liðsins í leiknum.

Ajax vann fyrri leikinn 1-0 á heimavelli Tottenham og komst síðan í 2-0 í leiknum í Amsterdam í gærkvöldi.

Það stefndi því allt í að hollenska liðið væri á leiðinni í úrslitaleik Meistaradeildarinnar á móti Liverpool.  

Þá var komið að þætti Lucas Moura sem skoraði þrennu í seinni hálfleiknum þar á meðal sigurmarkið á sjöttu mínútu í uppbótatíma.

Hið virta franska íþróttablað L’Equipe hefur ekki verið að spreða tíunum í einkunngjöf sinni í gegnum tíðina með blaðið var stofnað árið 1946.

L’Equipe gaf hins vegar Lucas Moura tíu í einkynn fyrir frammistöðu sína í gær. Hann var aðeins tíundi maðurinn í sögunni sem fær svo háa einkunn hjá blaðinu.

Lionel Messi er svo sá eini sem hefur tvisvar sinnum fengið tíu. Cristiano Ronaldo hefur aftur á móti aldrei fengið tíu hjá L’Equipe ekki frekar en þeir Zinedine Zidane eða Ronaldinho.

Hér fyrir neðan eru þeir sem hafa líka fengið tíu hjá L’Equipe:

1. Franck Sauzee (Frakkland U21 - Grikkland, 1988)

2. Bruno Martini (Frakkland  U21 - Grikkland, 1988)

3. Oleg Salenko (Rússland - Kamerún, 1994)

4. Lars Windfeld (Aarhus - Nantes, 1997)

5. Lionel Messi (Barcelona - Arsenal, 2010)

6. Lionel Messi (Barcelona - Bayer Leverkusen, 2012)

7. Robert Lewandowski (Borussia Dortmund - Real Madrid, 2013)

8. Carlos Eduardo (Nice - Guingamp, 2014)

9. Neymar (Paris Saint-Germain - Dijon, 2018)

10. Dusan Tadic (Ajax - Real Madrid, 2019)