Nýr kjarasamningur samþykktur hjá öllum félögum SGS

Niðurstöður atkvæðagreiðslu um nýjan kjarasamning Starfsgreinasambands Íslands og Samtaka atvinnulífsins á almennum vinnumarkaði liggja nú fyrir. Samningurinn var samþykktur með miklum meirihluta en þátttaka í atkvæðagreiðslu var heldur dræm eða 12,78 prósent.

80,06% þeirra sem greiddu atkvæði sögðu já, 17,33% sögðu nei og þá tók 2,61% ekki afstöðu.

Að því er fram kemur í tilkynningu frá Starfsgreinasambandinu voru niðurstöðurnar afgerandi í öllum félögum nema einu.

Í 17 aðildarfélögum SGS af 19 var nýr kjarasamningur samþykktur með yfir 70% atkvæða.

Kjarasamningur sem var undirritaðir 3. apríl síðastliðinn er þannig samþykktur hjá eftirfarandi aðildarfélögum SGS:

AFLi Starfsgreinafélagi, Öldunni stéttarfélagi, Bárunni stéttarfélagi, Drífandi stéttarfélagi, Eflingu stéttarfélagi, Einingu-Iðju, Framsýn stéttarfélagi, Stéttarfélagi Vesturlands, Stéttarfélaginu Samstöðu, Verkalýðsfélagi Akraness, Verkalýðsfélagi Grindavíkur, Verkalýðs- og sjómannafélagi Bolungarvíkur, Verkalýðs- og sjómannafélagi Sandgerðis, Verkalýðsfélagi Snæfellinga, Verkalýðsfélagi Suðurlands, Verkalýðsfélagi Vestfirðinga, Verkalýðsfélagi Þórshafnar, Verkalýðs- og sjómannafélag Keflavíkur og nágrennis og Verkalýðsfélaginu Hlíf.