„Ísland stolt af því að vera meðal stofnenda mannréttindasjóðs Alþjóðabankans“

Ísland, auk Noregs, Finnlands og Hollands, er stofnaðili að nýjum mannréttindasjóði Alþjóðabankans. Af því tilefni flutti utanríkisráðherra, Guðlaugur Þór Þórðarson, ávarp við stofnun sjóðsins í Washington í kvöld.

„Sjóðnum er ætlað að stuðla að öflun þekkingar, fræðslu og verkefnainnleiðingar á sviði mannréttinda þar sem áherslan er lögð á tengsl málaflokksins við starfsemi og rekstur bankans, meðal annars í óstöðugum ríkjum og á átakasvæðum“, segir í tilkynningu á vef Stjórnarráðsins.

Utanríkisráðherra lagði í ávarpi sínu áherslu á mikilvægi mannréttinda í þróunarsamstarfi, þá sagði hann að Ísland muni halda áfram að vinna með alþjóðlegum stofnunum að framgangi mannréttinda í heiminum.

„Það er okkur mikil og einlæg ánægja, en jafnframt skylda, að taka þátt í stofnun þessa nýja sjóðs. Við erum stolt af því að vera á meðal stofnenda hans,“ sagði Guðlaugur Þór Þórðarson, utanríkisráðherra í Washington

I was glad to attend the launch of the new Human Rights and Development Trust Fund at the World Bank, which #Iceland proudly supports #StandUp4HumanRights#WBGMeetings@wbg_govhttps://t.co/Pj0fkmXAi9

— Guðlaugur Þór (@GudlaugurThor) April 12, 2019