Kaldur og hræddur búinn að missa frá sér sleðann

Björgunarsveitir Slysavarnafélagsins Landsbjargar í Eyjafirði eru á leið upp á hálendi til leitar að göngumanni, að því er fram kemur í tilkynningu frá Landsbjörg sem send var út á áttunda tímanum í morgun.

Aðstandandi mannsins hafði samband í nótt og sagði manninn í vandræðum, væri líklega búinn að tapa hluta af búnaði sínum og orðinn þreyttur og hrakinn. Unnið er að því að staðsetja svæðið sem maðurinn er á til að auðvelda leitaraðgerðir.

Uppfært klukkan 08:18 með frekari upplýsingum frá Landsbjörg:

Maðurinn sem leitað er að ætlaði sér að ganga suður yfir hálendið á 2-3 vikum. Búið er að komast að því hvar hann var í fyrradag og fá munnlega lýsingu á því hvar hann var í gær. Er vonast til að þessar upplýsingar þrengi leitarsvæðið.

Þegar maðurinn hafði samband við aðstandendur í nótt var hann búinn að missa frá sér sleðann með farangri sínum. Sagðist hann vera kaldur, uppgefinn og hræddur. Björgunarmenn leggja því allt kapp á að finna hann sem fyrst.