Ótrúlegir yfirburðir Stjörnumanna í fjórða leikhluta á móti ÍR í vetur

Deildarmeistarar Stjörnunnar og ÍR hefja í kvöld undanúrslitaeinvígi sitt í úrslitakeppni Domino´s deildar karla í körfubolta og Breiðhyltingar þurfa þar nauðsynlega að breyta að minnsta kosti einu frá því í þremur innbyrðis leikjum liðanna í vetur.

Leikur Stjörnunnar og ÍR hefst klukkan 19.15 og verður sýndur beint á Stöð 2 Sport. Útsending Domino´s Körfuboltakvölds hefst klukkan 18.30 og mun hún vera í gangi í gegnum leikinn og gera síðan leikinn upp við lok hans.

Stjarnan og ÍR hafa mæst þrisvar sinnum áður á tímabilinu, tvisvar í deildinni og einu sinni í bikarnum. Stjarnan hefur unnið alla þrjá leikina með 14 stigum eða meira. Stærsti sigurinn var 23 stiga sigur í Seljaskólanum í janúarbyrjun.

ÍR-ingum hefur reyndar gengið vel í fyrri hálfleik í leikjunum þremur og hafa skorað sjö stigum meira í fyrri hálfleik (146) en Stjarnan (139) í þessum leikjum liðanna.

Seinni hálfleikurinn og þá sérstaklega fjórði leikhlutinn hefur aftur á móti farið mjög illa fyrir ÍR-liðið.Stjörnumenn hafa nefnilega haft ótrúlega yfirburði í lokaleikhlutanum á móti ÍR í vetur.

Stjarnan hefur unnið fjórða leikhlutann samtals með 43 stigum í þessum þremur leikjum þar sem ÍR-ingar hafa aðeins skorað samtals 36 stig.

Stjörnuliðið hefur unnið fjórðu leikhlutana 25-8 (+17), 27-13 (+14) og 27-15 (+12). Það eina jákvæða er að það hefur gengið aðeins betur hjá ÍR-liðinu í hverjum leik.

Það er þó ekki eins og bekkurinn sé að gera þarna útslagið því ÍR hefur fengið 13 stigum meira frá bekknum sínum (63 stig frá bekk) í þessum þremur leikjum en Stjörnumenn (50 stig frá bekk).

Úrslit eftir leikhlutum í leikjum Stjörnunnar og ÍR í vetur:

1. leikhluti: ÍR +1

Stjarnan 72 - ÍR 73

2. leikhluti: ÍR +6

Stjarnan 67 - ÍR 73

3. leikhluti: Stjarnan +18

Stjarnan 69 - ÍR 51

4. leikhluti: Stjarnan +43

Stjarnan 79 - ÍR 36