Tap í Lyon hjá Söru

Sara Björk Gunnarsdóttir og stöllur í þýska liðinu Wolfsburg töpuðu fyrri leiknum við Lyon í 8-liða úrslitum Meistaradeildar Evrópu.

Liðin sem spiluðu til úrslita síðasta vor drógust saman í 8-liða úrslitin og fyrri leikurinn fór fram í Lyon í kvöld.

Eugenie le Sommer kom heimakonum yfir á 11. mínútu og Wendie Renard tvöfaldaði forystuna aðeins sjö mínútum seinna. Róðurinn var því erfiður fyrir þýsku gestina.

Nilla Fischer náði að laga stöðuna fyrir Wolfsburg á 64. mínútu en þar við sat og Wolfsburg því marki undir í einvíginu.

Sara Björk spilaði allan leikinn fyrir Wolfsburg.

Liðin mætast öðru sinni í Þýskalandi að viku liðinni.