Gengi bréfa Icelandair rýkur upp

Gengi hlutabréfa Icelandair hafa rokið upp við opnun markaða í morgun. Bréfin hafa hækkað um rúmlega 26 prósent það sem af er degi, þar sem virði hvers bréf stendur nú í 10,65 krónum.

Hækkun bréfanna má rekja til frétta gærkvöldsins um að stjórn Icelandair Group hafi samþykkt að hefja viðræður við WOW air um aðkomu að rekstri WOW.

Í tilkynningu til Kauphallarinnar segir að hlutabréf Icelandair hafi hlotið athugunarmerkingu vegna viðræða íslensku flugfélaganna.

„Athugunarmerkingin er framkvæmd með vísan til ákvæðis 8.2 í reglum fyrir útgefendur fjármálagerninga. Í ákvæðinu kemur fram að Kauphöllin geti ákveðið að athugunarmerkja fjármálagerninga viðkomandi útgefanda tímabundið ef aðstæður eru fyrir hendi sem leiða af sér umtalsverða óvissu varðandi útgefandann eða verðmyndun fjármálagerninganna,“ segir í tilkynningunni.

Greint var frá því í gærkvöldi að bandaríska félagið Indigo Partners hefði slitið viðræðum um kaup á félaginu. Viðræður Icelandair og WOW fara fram í samráði við stjórnvöld og þar sem vísað er til ákvæða samkeppnislaga um fyrirtæki á fallandi fæti. Viðræðum á að ljúka fyrir mánudaginn næsta, 25. mars.

Uppfært 10:20:

Hækkunin hefur að stórum hluta gengið til baka þegar liðið hefur á morguninn. Nam hækkunin 10,5 prósent klukkan 10:20.