Vítaspyrna Ramos tryggði sigur á Norðmönnum

Sergio Ramos tryggði Spánverjum sigur á lærisveinum Lars Lagerback í norska landsliðinu í fyrsta leik liðanna í undankeppni EM 2020.

Spánverjar byrjuðu leikinn mun betur og tók það þá einungis um korter að nýta sér veikleika í vörn Norðmanna. Jordi Alba átti fyrirgjöf inn í teiginn sem Rodrigo Moreno setti í netið.

Spænska liðið hefði hæglega geta skorað fimm, sex mörk í fyrri hálfleik en staðan var þó aðeins 1-0 þegar flautað var til leikhlés.

Norðmenn fengu vítaspyrnu á 65. mínútu þegar Inigo Martinez var dæmdur brotlegur innan vítateigs. Joshua King fór á vítapunktinn og skoraði örugglega framhjá David de Gea.

Spánverjar fengu svo víti stuttu seinna, fyrirliðinn Ramos tók spyrnuna og skoraði.

Áfram sóttu Spánverjar mikið en náðu ekki að koma öðru marki í netið svo vítaspyrna Ramos réði úrslitum í leiknum, honum lauk með 2-1 sigri Spánar.