Hefur ekki trú á því að Icelandair kaupi WOW air

Jón Karl Ólafsson, fyrrverandi framkvæmdastjóri hjá Isavia og fyrrverandi forstjóri Icelandair, hefur ekki trú á því að þær viðræður sem nú standa yfir á milli Icelandair og WOW air endi með því að Icelandair kaupi WOW air.

Á fimmtudaginn var tilkynnt að Icelandair Group og WOW air hefðu aftur hafið viðræður um aðkomu að rekstri WOW air. Þann dag varð ljóst að Indigo Partners hefði slitið viðræðum um kaup á félaginu. Viðræðurnar á milli Icelandair og WOW air fara fram í samráði við stjórnvöld. Ætlunin er að ljúka viðræðunum fyrir morgundaginn.

Jón Karl var gestur á Sprengisandi á Bylgjunni í morgun ásamt hagfræðingnum Magnúsi Árna Skúlasyni sem vann skýrslu fyrir WOW air um áhrif þess færi fyrirtækið á hausinn. Í máli Jón Karls kom fram að hann teldi viðræðurnar væru að undirlagi stjórnvalda og að líklegt væri að þær snerust að mestu leyti um að tryggja að farþegar WOW air kæmust leiðar sinnar.

„Ég hef trú á því að þetta samtal sem nú á sér stað sé aðeins að undirlagi stjórnvalda. Að þau raunverulega ýti svolítið á að þetta samtal eigi sér stað. Þetta er ekkert alveg nýtt, þegar Air Berlin fór á hlíðina fyrir nokkrum misserum, að verða ár síðan, þá stigu þýsk stjórnvöld inni í og þau náðu að stýra því inn í það að það varð minni vandi,“ sagði Jón Karl.

Sér ekki að Icelandair hafi áhuga á Airbus-vélum WOW

Að hans mati væri ólíklegt að viðræðurnar myndi endu með kaupum Icelandair á WOW air.

„Ég hef ekki mikla trú á því að Icelandair ætli að kaupa WOW. Bara miðað við tölurnar, vandamálin í skuldabréfaútgáfunni, tapreksturinn undanfarna mánuði, tapreksturinn framundan. Þetta er eitthvað sem er mjög erfitt mál að fara að kaupa í heilu lagi,“ sagði Jón Karl.

Talað hefur verið um að í kjölfar flugbanns á Boeing 737 MAX vélarnar, sem eiga að verða uppistaðan í flugflota Icelandair, gæti Airbus flugvélar WOW air verið góður kostur fyrir Icelandair. Jón Karl blés hins vegar á þetta, ekki væri fýsilegt fyrir Icelandair að reka þrjár mismunandi tegundir af flugvélum, frá tveimur mismunandi framleiðendum.

„Ég sé ekki að Icelandair fari núna á hálfum mánuði að henda sér yfir í Airbus flugvélar með MAX-inn og 757-vélarnar í dag. Það er þegar orðið óhagræði í rekstri því að þetta er lítið flugfélag, hvort sem okkur líkar betur eða verr. Að fara að bæta þriðju flugvélategundinni við, það myndi vera mjög erfitt,“ sagði Jón Karl en hlusta má á viðtalið við hann og Magnús Árna hér fyrir neðan.