Jóna Þór­ey kjörin for­seti Stúdenta­ráðs Há­skóla Ís­lands

Jóna Þórey Pétursdóttir var í kvöld kjörin nýr forseti Stúdentaráðs Háskóla Íslands (SHÍ) með öllum greiddum atkvæðum.

Í tilkynningu frá Stúdentaráði skólans kemur fram að kosningin hafi farið fram á kjörfundi ráðsins. Skiptafundur fer fram í maí eftir að vorprófum í skólanum ljúka og tekur nýtt Stúdentaráð við í maí, sem og ný réttindaskrifstofa Stúdentaráðs.

„Jóna útskrifaðist með BA gráðu í lögfræði frá lagadeild Háskóla Íslands vorið 2018 og er að ljúka fyrsta ári í meistaranámi við deildina. Hún hefur starfað sem laganemi hjá Fulltingi slf. frá árinu 2017. Jóna er deildarfulltrúi laganema við lagadeild HÍ og sinnti aðstoðarkennslu við deildina í vetur. Hún hefur verið oddviti Röskvu, samtaka félagshyggjufólks við Háskóla Íslands, í Stúdentaráði síðastliðið ár. Röskva vann meirihluta í kosningum til Stúdentaráðs í febrúar.

Jóna Þórey hefur setið í SHÍ síðastliðið starfsár og lætur nú af störfum sem forseti sviðsráðs Félagsvísindasviðs, sem er eitt af fimm sviðsráðum fræðasviða Háskólans sem saman mynda Stúdentaráð.

Jóna hlakkar til komandi starfsárs og telur það geta skipt sköpum fyrir stöðu stúdenta í samfélaginu. Hún býst við að staðið verði við loforð um nýtt lánasjóðsfrumvarp og mun leggja áherslu á bætt kjör stúdenta og jafnrétti til náms.

Á kjörfundi voru einnig eftirfarandi fulltrúar kjörnir, með öllum greiddum atkvæðum, á Réttindaskrifstofu Stúdentaráðs:

Varaforseti: Benedikt Traustason

Hagsmunafulltrúi: Guðjón Björn Guðbjartsson

Lánasjóðsfulltrúi: Marinó Örn Ólafsson,“ segir í tilkynningunni.