KR tapaði naumlega fyrir lærisveinum Brad Friedel

Pepsi-Max deildarlið KR er í Bandaríkjunum um þessar mundir í æfingabúðum fyrir komandi átök sumarsins og í gærkvöldi lék liðið æfingaleik gegn MLS deildarliði New England Revolution.

KR tapaði með minnsta mun, 2-1 eftir að Luis Caicedo skoraði sigurmarkið skömmu fyrir leikslok en Ægir Jarl Jónasson hafði jafnað metin í 1-1 á 70.mínútu.

New England Revolution hafnaði í 8.sæti Austurdeildarinnar á síðustu leiktíð en þjálfari liðsins er enginn annar en Brad Friedel sem gerði garðinn frægan í enska boltanum með Liverpool, Blackburn, Aston Villa og Tottenham á árum áður.

Þetta var síðasti æfingaleikur bandaríska liðsins áður en keppni í MLS deildinni hefst þann 2.mars næstkomandi þar sem New England Revolution heimsækir Dallas.

KR-ingar hefja hins vegar keppni í Pepsi-Max deildinni þann 27.apríl næstkomandi þegar þeir heimsækja Stjörnuna

 

#NERevs head coach Brad Friedel on the KR Reykjavik result, injury updates, and looking ahead to the season opener.#NERevsInFL pic.twitter.com/m7ltaADZWp

— New England Revolution (@NERevolution) February 24, 2019