Þingmenn Miðflokks á eintali við sjálfa sig

Þingmenn í endurnýjuðum og fjölmennari þingflokki Miðflokksins mættu tvíefldir til leiks í umræðum á Alþingi í gær og héldu um þrjú hundruð ræður um frumvarp fjármálaráðherra um meðferð krónueigna sem háðar eru sérstökum takmörkunum og gjaldeyrismál. Miðflokksmenn áttu nánast eingöngu orðastað við hver annan.

Önnur umræða um frumvarp fjármálaráðherra um meðferð krónueigna sem háðar eru sérstökum takmörkunum og gjaldeyrismál hófst tiltölulega sakleysislega klukkan fjórar mínútur yfir þrjú í gærdag þegar Óli Björn Kárason formaður efnahags- og viðskiptanefndar mælti fyrir áliti fulltrúa allra flokka á Alþingi nema Miðflokksins. En Sigmundur Davíð Gunnlaugsson formaður Miðflokksins sat ekki fund nefndarinnar þegar málið var samþykkt vegna veikinda og varamaður mætti ekki í hans stað.

Óli Björn vitnaði í umsögn Seðlabankans við málið sem legði áherslu á að afgreiðsla frumvarpsins lægi fyrir áður en gjalddagi tiltekins flokks ríkisbréfa rynni upp, sem var í gær.

„Að öðrum kosti muni umfang krónueigna í lausu fé aukast um nær 70 prósent. Eða sem nemur 25 milljörðum króna,” sagði Óli Björn.

Sigmundur Davíð óttast brellur Seðlabankans

Eftir framsögu Óla Björns veitti Sigmundur Davíð andsvar og sagði að hann hefði aldrei talið koma til greina að kvitta upp á álit allra hinna flokkanna í nefndinni. Honum þætti óviðkvæmilegt að Seðlabankinn setti Alþingi hálfgerða afarkosti.

„Maður veltir fyrir sér hvort að þetta sé einhvers konar brella til að þetta stóra mál, þetta stóra grundvallarmál í uppgjörinu eftir losun hafta renni hér í gegn um aðra umræðu, atkvæðagreiðslu og þriðju umræðu á einum degi,” sagði Sigmundur Davíð. Eftir þetta andsvar áttu Sigmundur Davíð og Óli Björn nokkurn orðastað í andsvörum. 

Smári McCarthy þingmaður Pírata og Þorsteinn Víglúndsson þingmaður Viðreisnar komu einnig upp í andsvörum þar til kom að ræðu annars af nýju þingmönnum Miðflokksins, Ólafs Ísleifssonar, klukkutíma frá því umræður hófust.

Hiti færist í leikinn

Að lokinni ræðu Ólafs héldu þingmenn Miðflokksins sextíu og tvær ræður og andsvör fram til klukkan hálf átta í gærkvöldi þegar tæplega korters hlé var gert á fundinum. Þá flutti Sigurður Páll Jónsson þingmaður Miðflokksins ræðu og Einar Kárason þingmaður Samfylkingarinnar kom upp í andsvörum í tvígang. 

En að þeim loknum héldu þingmenn Miðflokksins fimmtíu ræður og andsvör fram til klukkan rúmlega ellefu í gærkvöldi þegar Bryndís Haraldsdóttir varaforseti þingsins gerði nokkurra mínútna hlé til að tilkynna um útbýtingu þingskjala. Eftir það héldu Miðflokksmenn 156 ræður til viðbótar fram til klukkan rúmlega fjögur í nótt en þá hafði færst slíkur hiti í umræður þingmanna Miðflokksins sín í milli að Steingrímur J. Sigfússon forseti Alþingis bað þá að gæta orða sinna og sagði þá ganga heldur langt í ummælum um aðra þingmenn.

„Sem láta að því liggja nokkuð sterklega að annarlegar hvatir liggi að baki afstöðu annarra þingmanna til þessa máls. Þannig að forseti fer fram á það að þótt að hér sé langt liðið á nótt og hér eigi orðaskipti flokksbræður að þeir gæti orða sinna,” sagði forseti Alþingis. 

Eftir þetta var þjarkað nokkuð um fundarstjórn forseta og haldnar nokkrar ræður áður en fundi var frestað klukkan tuttugu mínútur yfir fimm í morgun. Höfðu þingmenn Miðflokksins þá flutt 294 ræður og andsvör og ætla að halda umræðum áfram á Alþingi í dag.