Vörðust sveðjuárás trúða með hlaupahjóli

Hjónin Aretha Cardinal og Joseph Nelson komust í hann krappann í síðustu viku þegar tveir karlmenn, Jose Lugo og Luis Jimenez, klæddir trúðagrímum réðust að þeim fyrir utan heimili þeirra í Texas City í Texas-ríki í Bandaríkjunum. Mennirnir höfðu meðferðis sveðju og hótuðu hjónunum sem sátu í bíl sínum. AP greinir frá.

Hjónin voru ekki á þeim buxunum að láta ræna sig og tók Nelson upp á því að reyna að ná taki á sveðjunni, á meðan sótti Cardinal hlaupahjól barnabarns þeirra og sló til árásarmannsins.

Árásarmönnunum var brugðið þegar að hjónin streittust á móti og flúðu vettvanginn. Þau Cardinal og Nelson reyndu þó að elta mennina og brutu meðal annars rúðu á bíl mannanna, til þess notuðu þau hlaupahjólið.

Lögreglan í Texas City hafði að lokum upp á mönnunum og hafa þeir verið ákærðir fyrir tilraun til vopnaðs ráns.