Leitin að hamingjunni vesen í lífi okkar allra

Leit okkar að hamingjunni er gjarnan þyrnum stráð en getur einnig verið grátbrosleg. Kvikmyndin Vesalings elskendur, sem verður frumsýnd  14. febrúar, segir af vandræðagangi bræðranna Óskars og Magga og samferðafólks þeirra, sem öll reyna að fóta sig í hversdeginum með misjöfnum árangri.  Bræðurnir eiga báðir í stökustu vandræðum með náin sambönd en nálgast það vandamál á ólíkan hátt.

„Annar þeirra vill vera með öllum konum en hinn ekki neinum. Þetta er ofsalega skemmtileg mynd sem snertir mann, enda auðvelt að tengja við persónurnar sem allar eru í leit að hamingunni. Er ekki hamingjuleitin mesta vesenið í lífi okkar allra?“  segir Björn Thors, leikari en hann fer með hlutverk Óskars, bróðurins sem vill ekki vera með neinum og forðast tilfinningaleg tengsl.

„Einhverra hluta vegna lendi ég oft í að leika slíka menn, karlmenn á miðjum aldri sem ná ekki að þroskast. Hlýtur að vera tilviljun,“ segir hann sposkur.

Í myndinni segir einnig frá fjarlægum föður bræðranna sem á í svipuðum vandræðum, dýralækninum Önnu, sem sinnir hundi Óskars og stendur frammi fyrir mikilvægri ákvörðun. Listaspíran Ingibjörg reynir að fullorðnast eins hratt og hún getur og unglingarnir Danni T og Danni M hanga sífellt meira heima hjá Óskari.

Grátbroslegur vandræðagangur í daglega lífinu er ekki óþekkt stef í íslenskum bíómyndum. Vesalings elskendur er þó ekki dæmigerð íslensk kvikmynd, enda er handritshöfundur og leikstjóri myndarinnar sænskur.

„Maximilian Hult leggur dálítið aðrar áherslur en gjarnan má sjá í íslenskum kvikmyndum. Hann vinnur með fínlegri húmor en okkar íslenska, sem er oft groddalegur. Kómidían í hversdagsleikanum er allt í kringum okkur og Maximilian er sérstaklega flinkur að draga litlu hlutina í umhverfi okkar fram, öll þessi kómísku vandræði okkar við að lifa. Myndin verður þess vegna hlý og skemmtileg en vandræðaleg á saman tíma,“ segir Björn.

„Það er reyndar skemmtilegt að hann skuli gera myndina hér en sögusviðið var Stokkhólmur þegar hann skrifaði handritið og þar ætlaði hann að taka myndina upp. Röð tilviljana, meðal annars ákvæðið um 20% endurgreiðslu í íslenska kvikmyndaumhverfinu, varð til þess að verkefnið kom til Íslands og í það eru ráðnir íslenskir leikarar og íslenskt starfsfólk, sem er frábært.

Önnur aðalhlutverk eru í höndum Jóels Sæmundssonar, Eddu Björgvins og Söru Daggar Ásgeirsdóttur.

Vesalings elskendur verður frumsýnd 14. febrúar