Beckham kaupir í Salford City

Vinirnir úr 92 árganginum fræga hjá Man. Utd eiga nú 60 prósent í knattspyrnufélagi Salford City eftir að David Beckham ákvað að vera með og kaupa 10 prósent í félaginu.

Fyrir áttu Gary og Phil Neville hlut í félaginu sem og Ryan Giggs, Paul Scholes og Nicky Butt. 40 prósentin sem standa af eru í eigu auðkýfingsins Peter Lim frá Singapúr.

Beckham á því í tveimur félögum því hann á fyrir bandaríska félagið Inter Miami sem kemur inn í MLS-deildina á næsta ári.

Enska knattspyrnusambandið þarf að samþykkja Beckham sem hluta af eigendahópnum áður en kaupin verða formleg en það er talið vera formsatriði.

Salford er í fimmtu deildinni á Englandi og félagið stefnir upp í fjórðu deildina í vor. Það væri í fyrsta skipti sem félagið kemst þangað.