De Gea: Við erum ekki saddir

David de Gea, markvörður Man. Utd, segir að frábært gengi Man. Utd þessa dagana muni ekki skipta neinu máli ef liðinu tekst ekki að tryggja sér sæti í Meistaradeildinni á næstu leiktíð.

Man. Utd er búið að vinna átta leiki í röð undir stjórn Ole Gunnar Solskjær og stemningin eftir því miklu betri hjá félaginu.

Man. Utd á leik gegn Burnley á morgun og getur með sigri þar komist upp að hlið Chelsea sem er í fjórða sæti deildarinnar.

„Gengið er augljóslega búið að vera frábært en við erum ekki enn komnir í Meistaradeildarsæti og ansi langt frá því að vinna deildina. Við erum ánægðir með sigrana en langt frá því að vera sáttir með stöðuna,“ sagði De Gea.

„Þetta félag á að vera að berjast um titilinn en sjálfstraustið er að koma og við ætlum að ná eins góðum árangri og hægt er úr því sem komið er.“