Fannst látinn í klefa sínum á Litla-Hrauni

Fangi fannst látinn í klefa sínum á Litla-Hrauni í morgun. Þetta staðfestir Páll Winkel fangelsismálastjóri í samtali við Vísi en fyrst var greint frá dauðsfallinu á vef mbl.is.

Páll Winkel segir málið hafa verið tilkynnt til lögreglu sem tók það til rannsóknar. Er ekkert sem bendir til þess að dauða mannsins hafi borið að með saknæmum hætti. Páll segir að búið sé að hafa samband við aðstandendur fangans sem var íslenskur.

Hann segir viðbragðsáætlun hafa verið setta af stað á Litla-Hrauni sem felst fyrst og fremst í því að tryggja öryggi allra og hlúa hvert að öðru, hvort sem um er að ræða vistmenn eða starfsmenn.

„Þetta er auðvitað sláandi og það eru allir harmi slegnir,“ segir Páll.

Hann gat ekki tjáð sig um dánarorsök mannsins.