Ný handbók um sérsniðin skotfæri komin út

„Bókin er fyrst og fremst hugsuð fyrir skotáhugafólk, bæði skotveiði- og skotíþróttafólk,“ segir Böðvar Bjarki Þorsteinsson, höfundur bókarinnar Eins og skot. Bókin fjallar um hleðslu skotfæra, notkun þeirra og virkni en Böðvar segir áhuga á skotveiði og skotvopnum hafa aukist mjög undanfarin ár.

„Margir vilja kynna sér eða læra þessa hluti og fræðast fyllilega um skotfærin og virkni þeirra, hvað er rétt og hvað rangt, hvað má og hvað ekki. Við Steingrímur Steinþórsson útgefandi í Skruddu, vorum sammála um að við værum jafnvel að fara inn á „heitt" eða viðkvæmt svið en margir eru haldnir ákveðnum fordómum í garð skotfæra, skotvopna og veiðiskapar. Við komumst þó fljótt að því að heilmikill áhugi var fyrir bókinni. Sífellt bætist í hóp þeirra sem stunda þetta hugðarefni og bókin er hugsuð jafnt fyrir vana sem óvana.“

Fjöldi teikninga og skýringarmynda eru í bókinni en þær eru allar unnar eða teiknaðar af Böðvari sjálfum. Hann segir kúnstina við að handhlaða patrónur sport út af fyrir sig.

„Eins og titill bókarinnar vísar til, fjallar hún um hleðslu skotfæra, notkun og virkni. Með því er átt við hvernig skotfæri fyrir skotvopn, einkum riffla til veiða, eru hand- eða endurhlaðin af notandanum sjálfum og þannig útbúin til notkunar í stað verksmiðjuhlaðinna skotfæra. Notandinn hleður patrónur sínar púðri, hvellhettu og kúlu eftir að þær hafa verið notaðar en einnig handhlaða menn sín eigin skotfæri frá grunni með því að notast við ný og ónotuð hylki. Allt er þetta sérstök kúnst en hugsunin ekki óskyld því þegar stangveiðimenn hnýta sínar eigin veiðiflugur. Þannig fá menn sérsniðin skotfæri fyrir sinn smekk og spara jafnvel fjármuni í leiðinni. Hjá mörgu skotfólki verður þetta nánast sport út af fyrir sig, hvort sem um ræðir til markskotfimi eða veiðiskapar. Ég hafði stundað þetta áhugamál í fjölda ára samhliða skotmennskunni en hjá mér hefur einkum verið um veiðiskap að ræða,“ segir Böðvar sem unnið hefur að bókinni um langa hríð.

„Mér reiknast til að það séu um það bil 15 ár frá því ég hóf þessa vinnu en margir urðu til þess að annað hvort hvetja mig til dáða eða hreinlega sparka mér áfram. Upphaflega var einungis meiningin að setja á blað eitthvað fyrir sjálfan mig. Síðan vatt þetta smátt og smátt upp á sig. Sambærilegt efni hafði heldur aldrei fengið umfjöllun á íslensku enda þótt bækur um skotvopn og veiðiskap hafi verið gefnar út.“

Þessi kynning er unnin í samstarfi við höfund bókarinnar