Kaupæði greip netverja sem versluðu fyrir hundrað milljarða á 85 sekúndum

Sölumet var sett í netverslunum kínverska verslunarrisans Alibaba í dag er netverjar versluði fyrir einn milljarð dollara, um 120 milljarða króna, á fyrstu 85 sekúndum hins svokallaða „Singles Day“ sem er í dag. BBC greinir frá.

Þá var verslað fyrir um tíu milljarða dollara á fyrsta klukkutímanum, um 1.200 milljarða króna auk þess sem alls hefur verið verslað fyrir meira en 25 milljarða dollara, um þrjú þúsund milljarða króna, þrátt fyrir að enn sé nokkuð eftir af deginum.

Haldið hefur verið upp á Singles Day, eða dag einhleypinga frá árinu 2009 en það var raunar Alibaba sjálft sem fann upp daginn sem mótvægi við Valentínusardaginn sem iðulega er stór söludagur víða um heim.

Þessi tiltekni söludagur, sem haldinn er 11. nóvember ár hvert, hefur vaxið gríðarlega undanfarin ár og er nú stærsti einstaki söludagur í netverslunum á heimsvísu en slíkir dagar hafa ruðið sér til rúms að undanförnu.

Dagurinn hefur borist víða um heima, meðal annars til Íslands en í dag má finna tilboð á hinum ýmsu íslensku netverslunum.