Boðar sérgreinalækna á fund vegna rammasamnings á næstu dögum

Verið er að leggja lokahönd á samningsmarkmið stjórnvalda vegna rammasamnings við sérfræðilækna. Forstjóri Sjúkratryggina Íslands segir að mjög ólíklegt að svo fari að sjúklingar þurfi sjálfir að leggja út fyrir kostnaði vegna heilbrigðisþjónustu. 

Líkt og fram hefur komið rennur rammasamningur Sjúkratrygginga Íslands við sérfræðilækna út um áramótin og eins og staðan er núna stendur til að framlengja gildandi samningi þar til nýr er í höfn. Talsmenn sérfræðilækna hafa aftur á móti lýst því yfir að það hugnist þeim ekki. Í hádegisfréttum Bylgjunnar í dag sagði Þórarinn Guðnason, formaður Læknafélags Reykjavíkur, að ef ekki verði samið við sérfræðilækna fyrir áramót muni þeir kjósa að standa utan samnings.

En hver er staðan í samningaviðræðunum nú?

„Það er verið að leggja lokahönd á samningsmarkmið stjórnvalda sem að við fáum svo í hendur og við erum jafnframt að undirbúa fundarboð til Læknafélags Reykjavíkur sem hefur verið tilnefnt sem talsmaður sérgreinalækna,” segir María Heimisdóttir, forstjóri Sjúkratrygginga. Býst hún við að það verði öðru hvoru megin við helgina. Upp gæti komið upp sú staða að notendur þurfi sjálfir að leggja út fyrir öllum kostnaði ef hvorki nýr samningur liggur ekki fyrir né gildandi samningur framlengdur um áramótin. María telur hverfandi líkur á að svo fari.

„Það held ég alls ekki á þessum tímapunkti. Að sjálfsögðu er það markmiðið hjá okkur að ná samningum, ná samningum áður heldur en þessi samningur rennur út. Ef að það gerist ekki þá höfum við verkfæri til þess að bregðast við því, til dæmis með endurgreiðslugjaldskrá og ég held að við eigum ekkert að spá því að þetta fari eitthvað verr,” segir María.