97 prósent líkur á að Ísland falli úr Þjóðadeildinni

Íslenska landsliðið í fótbolta er líklegast af öllum liðunum í A-deild Þjóðadeildarinnar til að falla niður í B-deild samkvæmt útreikningum tölfræðifyrirtækisins Gracenote.

Áður en að keppnin hófst voru 68 prósent líkur á því að Ísland myndi falla samkvæmt Gracenote en eftir töpin tvö á móti Sviss og Belgíu samanlagt 9-0 eru núna 97 prósent líkur á því að Ísland hafni í neðsta sæti B-riðils og spili í B-deildinni að tveimur árum liðnum.

Líkur Íslands á að vinna riðilinn úr því sem komið er eru 0,2 prósent sem eru minnstu líkurnar hjá nokkru liði. Aðeins eru þrjú prósent líkur að England og Króatía vinni D-riðilinn og tíu prósent líkur á að Ítalía vinni C-riðilinn.

Líkurnar á að Ísland vinni Þjóðadeildina eru engar en samkvæmt nákvæmum útreikningum svo dæmið gangi upp í 100 prósent eru strákunum okkar gefnar 0,05 prósent líkur. Króatía og England eru þar rétt fyrir ofan með eitt prósent líkur á sigri í B-deildinni.

Spáni eru gefnar mestar líkur á því að vinna Þjóðadeildina eða 27 prósent og þar á eftir koma Belgar og Frakkar með 21 prósent.

Líkur á að vinna hvern riðil í Þjóðadeildinni:

A-riðill: Frakkland 67%, Þýskaland 20%, Holland 13%

B-riðill: Belgía 74%, Sviss 26%, Ísland 0%

C-riðill: Portúgal 69%, Pólland 21%, Ítalía 10%

D-riðill: Spánn 94%, England 3%, Króatía 3%

Líkur á að hafna í neðsta sæti hvers riðils:

A-riðill: Holland 57%, Þýskaland 38%, Frakkland 6&

B-riðill: Ísland 97%, Sviss 3%, Belgía 1%

C-riðill: Ítalía 49%, Pólland 43%, Portúgal 9%

D-riðill: Króatía 53%, England 47%, Spánn 0%

Líkur á að vinna Þjóðadeildina:

Spánn 27%

Belgía 21%

Frakkland 21%

Portúgal 15%

Þýskaland 5%

Sviss 4%

Pólland 2%

Holland 2%

Ítalía 2%

England 1%

Króatía 1%

Ísland 0%