Lengsta áætlunarflug heims ekki fyrir hvern sem er

Singapore Airlines hefur í dag áætlunarflug milli Singapúr og New York á ný en fimm ár eru síðan flugfélagið flaug síðast milli borganna. Þetta verður lengsta áætlunarflug í heimi, um 15 þúsund kílómetra leið og er flugtíminn um nítján klukkustundir.

Ljóst er að ekki verður á allra færi að ferðast umrædda flugleið, en ekki verða seldir miðar í almennu farrými. Þó verða í boði 67 sæti í „business-flokki“ og 94 svokallaðir „premium economy“.

Flugfélagið notast við vél af gerðinni Airbus A350-900 og býður vanalega upp á sæti fyrir 253 farþega, þar af 187 í almennu farrými.

BBC  greinir frá því að umrædd gerð af flugvél er sú gerð sem getur verið lengst á lofti, eða í um tuttugu klukkustundir.

Farþegar á „business class“ munu fá tvær máltíðir sem þeir geta sjálfir valið hvenær þeir fá, auk þess að þeir fá rúm. Farþegar á „premium economy“ verða hins vegar að sætta sig við þrjár máltíðir á fyrirfram ákveðnum tímum.

Hátt olíuverð

Singapore Airlines hætti að fljúga milli borganna árið 2013 vegna hækkandi olíuverðs.

Næst lengstu áætlunarflugin á markaði eru milli áströlsku borgarinnar Perth og London með Qantas og milli Auckland á Nýja-Sjálandi og katörsku böfuðborgarinnar Doha með Qatar.