Innlent

Leita til heilsufyrirtækis vegna áhyggja starfsfólks KSÍ af álagi

Kolbeinn Tumi Daðason skrifar
Strákarnir okkar saman út við hornfána á Stade de France að loknu 5-2 tapinu gegn Frökkum á EM 2016. Álag á starfsfólk KSÍ hefur aukist í takt við tíðari þátttöku á stórmótum.
Strákarnir okkar saman út við hornfána á Stade de France að loknu 5-2 tapinu gegn Frökkum á EM 2016. Álag á starfsfólk KSÍ hefur aukist í takt við tíðari þátttöku á stórmótum. Vísir/Vilhelm
Stjórn Knattspyrnusambands Íslands ætlar að leita til heilsufyrirtækisins Auðnast til að bregðast við áhyggjum starfsfólks sambandsins af miklu vinnuálagi í starfi. Þetta kemur fram í fundargerð stjórnar frá því þriðjudaginn 25. september. 

 Undir liðnum önnur mál var fjallað um bréf sem barst stjórn frá starfsmönnum sambandsins þann 31. ágúst. Í bréfinu lýsir starfsfólk áhyggjum sínum.

 „Stjórn KSÍ og framkvæmdastjóri taka málið alvarlega og munu bregðast við m.a. í samráði við heilsufyrirtækið Auðnast,“ segir í fundargerðinni.

Mikið hefur mætt á starfsfólki KSÍ undanfarin ár og þar á meðal framkvæmdastjóranum Klöru Bjartmarz.vísir/egill
Klara Bjartmarz, framkvæmdastjóri KSÍ, segir bréfið hafa borist frá starfsmönnum sambandsins, ekki einstaka starfsfólki. Um tuttugu manns vinna á skrifstofu KSÍ og hefur fjöldinn verið svipaður undanfarin ár. 

Þrjú ár í röð hafa A-landslið karla og kvenna komist í lokakeppnir stórmóta. EM 2016 í Frakklandi og HM 2018 í Rússlandi hjá körlunum og EM 2017 í Hollandi hjá konunum. Samkvæmt heimildum Vísir er það ekki síst vegna þessara móta sem álag starfsfólks hefur aukist til muna. Margir gangi í hin ýmsu störf sem fylgi slíkum verkefnum.

Starfsfólk KSÍ fékk greiddan aukamánuð vegna starfa í kringum EM í Frakklandi árið 2016. KSÍ greiðir almennt ekki yfirvinnu en sökum vinnuálags í tengslum við mótið var samþykkt að greiða starfsmönnum sambandsins aukamánuð.

Athygli vakti að þáverandi formaður, Geir Þorsteinsson, fékk tvo mánuði greidda í bónus á meðan annað starfsfólk fékk einn.

Mest lesið


Fleiri fréttir

Sjá meira


×

Mest lesið