Mælir með því að spila á Íslandi en ætlar að segja þetta gott af Íslandsævintýrum

Jeppe Hansen er á sínu síðasta tímabili á Íslandi ef marka má viðtal við hann á dönsku fótboltasíðunni bold.dk.

Þar er því réttilega slegið upp að Jeppe Hansen hafi bæði fallið úr Pepsideildinni og komist upp í hana aftur á þessu tímabili.

Jeppe Hansen hóf tímabilið með Keflavíkurliðinu sem er fyrir löngu fallið úr deildinni en fór yfir til ÍA á miðju tímabili og hjálpaði Skagamönnum að vinna sér sæti í Pepsideildinni á nýjan leik.

Jeppe Hansen skoraði 15 mörk í 21 leik með Keflavík í Inkasso deildinni í fyrra og liðið komst upp. Hann náði hins vegar ekki að skora í 10 leikjum með Keflavík í Pepsideildinni í sumar.

„Það var erfitt að vera í Keflavík því við bara töpuðum, töpuðum og töpuðum. Það var líka eitthvað vesen utan vallar. Félagið vildi spara sér pening og ÍA fékk mig á láni. Ég stökk á möguleikann á að komast eitthvert annað,“ sagði Jeppe Hansen við bold.dk.

„Ég sé líka ekki eftir því. Ég átti nokkra góða mánuði hér. Við vorum bara ekki nálægt því að skora mark hjá Keflavík. Við sköpuðum ekki færi og ég var ekki nálægt því að skora,“ sagði Hansen.

„Ég var í hreinskilni bara orðinn leiður á fótbolta í sumar en ég fékk gleðina aðeins til baka eftir tímann hjá ÍA. Ég er líka ánægður að hafa náð að enda tímabilið svona,“ sagði Hansen.

Hansen hefur skorað 6 mörk í 9 leikjum með ÍA í Inkasso deildinni og félagið hefur tryggt sér sæti í Pepsideildinni 2019. Hansen ætlar hinsvegar ekki að taka slaginn með Skagamönnum næsta sumar ef marka má þetta viðtal.

Hansen segist vera á leiðinni heim til Danmerkur eftir fimm ár á Íslandi.

„Það hafa bæði verið góðir og slæmir tímar. Ég veit ekki hvort ég geti sagt að ég hafi slegið í gegn hér. Ég hef samt verið ánægður og mæli með því fyrir aðra fótboltamenn að fara til Íslands,“ sagði Hansen.

„Það er gaman að búa erlendis og fá tækifæri til að lifa af áhugamálinu. Ég er bara kominn á stað að ég upplifað nóg af Íslandi og nú vil ég bara fara heim til Danmerkur,“ sagði Hansen en það má lesa allt viðtalið við hann hér.