Enginn fótbolti í tvær vikur eftir að áhorfandi dó á vellinum

Nágrannaslagur í indónesísku úrvalsdeildinni endaði á hörmulegan hátt er stuðningsmaður annars liðsins lést í átökum fyrir utan völlinn.

Íþróttamálaráðherra Indónesíu ákvað í kjölfarið að ekkert yrði spilað í deildinni næstu tvær vikurnar á meðan farið væri yfir hvernig koma má í veg fyrir slíkar uppákomur í framtíðinni.

„Ef þetta mál verður leyst á viku þá munum við byrja aftur strax þá. Við vonum að þetta mál taki ekki of langan tíma,“ sagði íþróttamálaráðherrann.

Dauðsfallið um síðustu helgi var sjöunda dauðsfallið hjá stuðningsmanni í indónesíska boltanum síðan 2012. Sextán manns hafa verið handteknir vegna andlátsins um helgina.