Eins og leikhús fáránleikans

Fjölmiðlafárið í kringum efnahagshrunið 2008 var dálítið eins og leikhús fáránleikans að sögn Urðar Gunnarsdóttur, fyrrverandi upplýsingafulltrúa utanríkisráðuneytisins. Reynslubolti úr norska hernum hafi veitt kærkomna aðstoð við almannatengsl og skipulagsutanumhald um erlenda fjölmiðla.

Urður var gestur Kristjáns Kristjánssonar í þættinum Sprengisandi á Bylgjunni í morgun. Þar rifjaði Urður upp fjölmiðlafárið í kringum efnahagshrunið í byrjun október 2008. Að ýmsu var að huga enda stjórnsýslan ekki vön að takast á við verkefni af þessari stærðargráðu. Hún segir að starfsliðið hafi kallað norska almannatengilinn Stígvélaða köttinn.

Bjó til ramma utan um fullkomna óreiðu

„Hann var með reynslu, meðal annars, úr norska hernum sem nýttist alveg gríðarlega vel því hann kom bara inn og setti strúktúr á viðbrögðin þannig að allir fengu hlutverk og það yrði að setja upp blaðamannamiðstöð og sá svona um að búa til einhvern ramma í kringum fullkomna óreiðu,“ segir Urður.

Fáir starfsmenn stjórnarráðsins hafi annast þetta utanumhald en á þessum tíma voru ekki starfandi upplýsingafulltrúar í öllum ráðuneytum. Sjálf hafi hún búið vel af reynslu sinni erlendis frá.

„Ég hafði hins vegar enga reynslu af því að vera partur af því sem er að gera. Þegar maður að vinna erlendis og er, eins og ég hafði lent í nokkrum byltingum, Appelsínugulu byltingunni, Rósabyltingunni, Úkraínu og Georgíu og alls konar svona, þá er hægt að halda ákveðinni fjarlægð af því þú ert bara að vinna, þú ert bara fagmaður og ert að vinna við þetta en þegar þú ert heima og landið þitt er í þessum vandræðum og maður veit ekkert nema að það sé að fara á hausinn, það er allt öðruvísi og það er rosalega erfitt,“ segir Urður.

Hér að neðan er hægt að hlusta á viðtalið við Urði í heild sinni.