Konur, menntað og eldra fólk vilja heldur halda í dönskuna

Skiptar skoðanir eru á meðal landsmanna á því hvort hætta eigi dönskukennslu í grunnskólum landsins og kenna annað tungumál í staðinn. Þetta er niðurstaða nýrrar könnunar MMR sem framkvæmd var dagana 12. til 18. júní. Svarendur skiptust í jafnar fylkingar í afstöðu sinni til málsins en 38% voru andvíg og 38% fylgjandi breytingum á tungumálakennslu, þar af 18% mjög andvíg og 21% mjög fylgjandi. 24% svarenda kváðust hvorki andvígir né fylgjandi slíkum breytingum.

Nokkurn mun var að sjá á afstöðu svarenda eftir lýðfræðihópum. Konur (41%) voru líklegri heldur en karlar (35%) til að segjast andvígar hugmyndum um að hætta dönskukennslu í grunnskólum landsins og kenna annað tungumál í staðinn en um fjórðungur karla (24%) kvaðst mjög fylgjandi slíkum breytingum. Andstaða við breytingar á dönskukennslu jókst eftir aldri en svarendur 68 ára og eldri (52%) voru líklegastir til að styðja við óbreytt fyrirkomulag.

Andstaða við breytingar á dönskukennslu jókst einnig með aukinni menntun en tæp 52% háskólamenntaðra sögðust frekar eða mjög andvíg hugmyndum um breytingar á kennslu, samanborið við tæp 23% þeirra sem lokið höfðu skólagöngu sinni eftir útskrift úr grunnskóla. Þá jókst andstaða gegn breytingum einnig með auknum heimilistekjum. Engan mun var að sjá á afstöðu svarenda eftir búsetu.

Þegar litið var til stjórnmálaskoðana svarenda mátti einnig sjá mun á afstöðu svarenda. Stuðningsfólk Vinstri grænna (63%) og Framsóknarflokks (57%) var líklegast til að lýsa andstöðu gegn breytingum á dönskukennslu en þar af sögðust tæplega 30% stuðningsfólks Vinstri grænna mjög andvíg slíkum breytingum. Stuðningsfólk Viðreisnar (50%), Miðflokks (45%) og Pírata (44%) voru hins vegar líklegust til að vera fylgjandi þeirri hugmynd að kenna annað tungumál í grunnskólum í stað dönsku.

Könnunin fór fram í spurningavagni MMR og voru 925 einstaklingar sem svöruðu spurningunni: Hversu fylgjandi eða andvíg(ur) ert þú hugmyndum um að hætta dönskukennslu í grunnskólum landsins og kenna annað tungumál í staðinn?“

Nánar má lesa um niðurstöðuna í könnun MMR hér.