Telma gerði fjögur mörk í stórsigri Stjörnunnar

Breiðablik endurheimti toppsæti Pepsi deildar kvenna með sigri á Selfossi. Stjarnan vann öruggan sigur á FH og Grindavík hafði betur gegn KR í botnslag suður með sjó.

Blikar töpuðu sínum fyrsta leik í sumar á Akureyri í síðustu umferð. Þær sóttu Selfyssinga heim í kvöld. Landsliðskonan Selma Sól Magnúsdóttir gerði eina mark leiksins með frábæru einstaklingsframtaki í upphafi seinni hálfleiks.

Í Garðabænum mætti Stjarnan liði FH. Telma Hjaltalín Þrastardóttir er nýkomin til baka úr erfiðum meiðslum og hún gerði fjögur mörk fyrir Stjörnuna í kvöld.

Telma skoraði þrennu á þrettán mínútum í fyrri hálfleik eftir að Jasmín Erla Ingadóttir hafði komið FH yfir í upphafi leiks. Staðan 3-1 fyrir Stjörnuna í hálfleik.

Fyrirliðinn Ásgerður Stefanía Baldursdóttir bætti við fjórða marki Stjörnunnar í upphafi seinni hálfleiks áður en Telma bætti við sínu fjórða, og fimmta marki Stjörnunnar. Hún meiddist hins vegar eftir markið og þurfti að bera hana á börum af leikvelli. María Eva Eyjólfsdóttir gekk svo algjörlega frá leiknum á 88. mínútu. 

Marjani Hing-Glover náði sárabótamarki fyrir FH undir lok venjulegs leiktíma eftir mistök Megan Dunnigan í vörn Stjörnunnar, en það kom ekki að sök, öruggur 6-1 sigur Stjörnunnar.

KR og Grindavík höfðu aðeins unnið einn leik hvor þegar liðin mættust í Grindavík í kvöld. KR sat á botni deildarinnar með þrjú stig, Grindvíkingar í 8. sæti með 6. Tvö mörk með mínútumillibili í fyrri hálfleik tryggðu Grindavík sigurinn, Helga Guðrún Kristinsdóttir skoraði með glæsilegu skoti áður en Rio Hardy bætti við.

Mia Gunter náði að svara fyrir KR áður en flautað var til hálfleiks en nær komust KR-ingar ekki, lokastaðan 2-1 fyrir Grindavík.

Upplýsingar um úrslit og markaskorara eru fengnar frá Fótbolta.net.