Þekktu rauðu ljósin: „Ég mátti ekki fara í skólann“

„Þetta var bara stjórnunarsamband með mikilli afbrýðisemi og hann algjörlega réði öllu,“ segir Unnur Mjöll Harðardóttir sem var í ofbeldissambandi í tvö ár með hléum. Unnur tekur þátt í herferðinni Þekktu rauðu ljósin og í einlægu myndbandi segir hún frá sinni reynslu af grófu ofbeldissambandi.

„Þetta var andlegt líkamlegt og kynferðislegt ofbeldi.“

Líkamlega ofbeldið byrjaði þegar hún byrjaði að búa með ofbeldismanninum.

„Þá er maður einhvern vegin svo fastur.“

Afbrýðisemin og stjórnunaráráttan setti sterkan svip á líf Unnar.

„Hann hélt mér vakandi kannski nóttina fyrir próf og ég mátti ekki mæta í skólann.“ 

Hélt að hún gæti hjálpað ofbeldismanninum

Unnur endaði á því að fara því hún var aðframkomin af svefnleysi.

„Það var farið að ágerast líkamlega ofbeldið. Það var orðið svo oft.“

Eftir að Unnur fór upplifði hún frelsi, hún réð því hvert hún færi og hvað hún væri þar lengi. Hún segir að í byrjun sambandsins hafi verið hegðun sem hefði átt að kveikja á einhverjum ljósum hjá sér, eins og sjúkra afbrýðisemin.

„Ég fékk viðvaranir um hann sem hann einhvern vegin náði alveg að snúa út úr. Hann var svo góður, hann var svo fullkominn í byrjun að ég trúði ekki að hann gæti verið svona.“

Hún þráði alltaf að hann yrði aftur eins og í byrjun sambandsins.

„Og að ég gæti hjálpað honum. Ég bæri ábyrgð á að honum liði vel.“

Unnur viðurkennir að hafa hundsað merkin og hvetur aðrar til að gera ekki sömu mistök.

Herferðin Þekktu rauðu ljósin er svar Kvennaathvarfsins og Bjarkarhlíðar við síaukinni eftirspurn ungs fólk eftir aðstoð vegna ofbeldis í nánum samböndum. Umræðan um ofbeldi í nánum samböndum beinist oft að fólki sem hefur búið saman og ofbeldið átt sér stað innan veggja heimilisins en skortur er á efni sem beint er til fólks sem er að hefur nýhafið samband.

Herferðin miðar að því að minna á að ofbeldi birtist smátt og smátt í samböndum, að ýmis viðvörunarmerki eru oft undanfari ofbeldisins.  Vitundarvakningin felst í stuttum myndböndum þar sem nokkrar hugrakkar konur sem stigið hafa út úr ofbeldissamböndum líta til baka og ræða viðvörunarljósin sem birtust í sambandinu þó þær hafi ekki séð þau fyrr en of seint.

„Það er von okkar að þessi vitundarvakning auki skilning fólks á ofbeldi í nánum samböndum og hjálpi fólki að sjá rauðu ljósin áður en til ofbeldis kemur.“

Kynntu þér úrlausnir hjá Bjarkarhlíð og Kvennaathvarfinu.

Nánari upplýsingar: 

https://www.rauduljosin.is/

https://www.facebook.com/rauduljosin/

https://twitter.com/rauduljosin