Lækkun veiðigjalda þolir enga bið að sögn formanns atvinnuveganefndar

Formaður atvinnuveganefndar segir sjávarútvegsráðherra verða að svara fyrir það hvers vegna frumvarp um lækkun veiðigjalda hafi ekki verið lagt fram fyrr. Málið þoli aftur á móti enga bið þar sem minni útgerðir séu að sigla í þrot. Stjórnarandstaðan kom í veg fyrir að frumvarpið yrði tekið til umræðu á Alþingi í gær.

Frumvarp sem felur í sér lækkun veiðigjalda komst ekki á dagskrá Alþingis í gær en verður tekið fyrir í atvinnuveganefnd eftir helgi. Ljóst er að málið hefur sett þingstörf í algjört uppnám og ólíklegt er að Alþingi fari í sumarhlé á fimmtudag líkt og starfsáætlun gerir ráð fyrir. Stjórnarandstaðan kom í veg fyrir að málið yrði tekið á dagskrá í gær en stjórnarmeirihlutinn hefur verið harðlega gagnrýndur fyrir að skella pólitískt eldfimu máli á dagskrá svo skömmu fyrir sumarhlé.

Lilja Rafney Magnúsdóttir, formaður atvinnuveganefndar og þingmaður VG, segir málið ekki þola bið.

„Staðan er bara sú hjá mörgum minni fyrirtækjum að þau þola ekki þessa bið. Þau eru búin að vera að greiða veiðigjöld sem hafa hækkað um 2-300% frá september í fyrra, jafnvel meira, og þær útgerðir eru annað hvort að leggja upp laupana eða þessar stærri að kaupa þessar minni upp og það verður bara að grípa inn í þetta sem fyrst,“ segir Lilja Rafney.

Skiljanlega hafi mörgum brugðið við að málið kæmi fram með svo skömmum fyrirvara að sögn Lilju. Aftur á móti séu flokkar á þingi sammála um að galli sé á núverandi kerfi um veiðigjöld þar sem þau miði við afkomu fyrri ára. „Ég held að við ættum alveg að geta sammælst um þetta miðað við það að það eru allir hlynntir því að afkomutengja veiðigjöld, og við rauntíma.

Meðal þess sem gagnrýnt hefur verið er að lækkunin skili sér í mestum mæli stóru útgerðarfélaganna sem mörg hver hafi greitt út mikinn arð á undanförnum árum og fjárfest fyrir tugi milljarða. „Það er umhugsunarefni hve mikið af aflaheimildum er komið á hendur örfárra útgerða í landinu. Og það segir sig auðvitað sjálft að þegar að stærstu útgerðirnar eru komnar með yfir 80% af aflaheimildum, þá eru þær auðvitað að borga hæstu veiðigjöldin,“ segir Lilja Rafney.