Bale: Hlýtur að vera flottasta markið │ Hugsar sér til hreyfings

Hetja Real Madrid, Gareth Bale, í úrslitaleiknum gegn Liverpool en hann skoraði síðari tvö mörk liðsins í 3-1 sigrinum.

Bale skoraði stórbrotið mark er hann kom Real í 2-1 en markið má sjá hér. Wales-verjinn segir að þetta hljóti að vera flottasta markið í Meistaradeildinni og að hann muni skoða sín mál í sumar.

„Auðvitað var ég mjög ósáttur að byrja ekki leikinn. Mér fannst ég verðskulda það en stjórinn tekur ákvarðirnar. Það besta sem er hægt að gera er að koma inn og hafa áhrif sem ég gerði klárlega,” sagði Bale.

„Þetta hlýtur að vera flottasta markið í Meistaradeildinni. Það er ekki til stærra svið. Ég er bara ánægður að vinna. Þetta er liðsíþrótt en þegar þú ert varamaður þá er þetta leikur hjá fleiri en þeim ellefu. Ég hafði áhrif.”

Sjá einnig:Bale kláraði Liverpool og Real meistari þriðja árið í röð

„Við létum aðra um það að tala. Við vissum hversu hungraðir við vorum, hversu vel undirbúnaðir og mótiveraðir við vorum,” en næst beindist talið að framtíð Bale en hann hefur verið mikið orðaður burt frá Madrid:

„Ég verð að spila viku eftir viku og það hefur ekki verið að gerast á þessari leiktíð. Ég hef verið meiddur í fimm til sex vikur en hef verið heill síðan. Ég verð að setjast niður í sumar með umboðsmanni mínum og ræða framhaldið."