Vieira tilbúinn ef kallið kemur

Arsenal-goðsögnin Patrick Vieira segist vera tilbúinn til þess að taka við liði Arsenal af Arsene Wenger ef félagið hefur áhuga á því að ráða hann í vinnu.

Vieira segist þó ekki hafa heyrt frá Arsenal og bendir á að hann eigi enn eftir að klára tímabilið með New York City í MLS-deildinni. Hann skrifaði undir þriggja ára samning við félagið árið 2016.

Arsenal er í sinni fyrstu þjálfaraleit í 22 ár og nafn Vieira er eitt af þeim fyrstu sem kom upp í umræðunni um arftaka Wenger.

Vieira var fyrirliði Arsenal hjá Wenger er liðið var afar sigursælt.

„Ef spurningin er hvort ég sé tilbúinn í svona verkefni þá er svarið já. Ég get samt sagt heiðarlega frá því að Arsenal hefur ekki verið í sambandi,“ sagði Vieira en hann hefur verið að standa sig vel í bandaríska boltanum.