Ólafur Helgi til Njarðvíkur

Ólafur Helgi Jónsson er genginn til liðs við Njarðvík á nýjan leik en körfuknattleiksdeild félagsins staðfesti það fyrr í dag en hann skrifaði undir þriggja ára samning.

 

Ólafur Helgi kemur frá Þór Þorlákshöfn en nýr þjálfari hans, Einar Árni, kom einmitt þaðan fyrir nokkrum dögum og því var aðskilnaður þeirra ekki langur.

 

Friðrik Pétur Ragnarsson, formaður körfuknattleiksdeildar Njarðvíkur,  var hæstánægður með að fá Ólaf Helga til liðsins á nýjan leik.

 

,,Við í stjórn körfuknattleiksdeildarinnar erum hæstánægð með að endurheimta Ólaf í okkar raðir enda gríðarega öflugur leikmaður og sterkur karakter,” sagði Friðrik við undirritun samningsins í dag.

 

Ólafur var einnig spurður út í endurkomuna og sagðist hann var spenntur fyrir því að spila með uppeldisfélaginu á nýjan leik.

 

,,Hér þekki ég best til og tel okkur vera að setja saman mjög sterkan hóp fyrir næstu leiktíð,” sagði Ólafur.